Бразилската фудбалска легенда Дани Алвеш (42) е подготвен за едно од најневеројатните поглавја во својата кариера. По долгиот и контроверзен престој зад решетки, поранешниот ас на Барселона не само што се враќа во фудбалот, туку го прави тоа во двојна улога – како сопственик и како главно засилување на теренот.
Газда на португалски третолигаш
Според ексклузивните информации на ЕСПН и лисабонското радио „Опсервадор“, Алвеш ги финализира преговорите за преземање на португалскиот клуб Спортски Клуб Сао Жоао де Вер. Наместо само да седи во свечената ложа, Бразилецот планира да биде активен играч и да го предводи тимот на теренот најмалку до јуни 2026 година.
Правен пресврт: Од осуденик до слободен човек
Животот на Алвеш се преврте наопаку во јануари 2023 година, кога беше уапсен под обвинение за сексуален напад во Барселона. Иако првично беше осуден на четири и пол години затвор, неговиот правен тим успеа да издејствува пресврт кога шпанскиот суд ја поништи првичната пресуда поради „недоволно докази“. Алвеш ја напушти затворската ќелија во март 2024 година, по плаќањето кауција од еден милион евра. Но, иако обвинителството поднесе жалба до Врховниот суд, Алвеш веќе го подготвува својот голем камбек.
„Дајте ми 30 дена и ќе бидам како нов!“
И покрај тоа што нема одиграно официјален натпревар повеќе од две години (последен пат настапи за мексикански Пумас во јануари 2023 година), Алвеш е полн со самодоверба. Тој веќе вежба по специјален режим во домашни услови и тврди дека му се потребни само 30 дена интензивни тренинзи за да биде во топ форма.
„Јас сум ученик на Исус Христос“, вели Алвеш, кој во најтемниот период од животот целосно ѝ се посвети на религијата, редовно споделувајќи духовни пораки со своите 35 милиони следбеници на социјалните мрежи.
Планови за иднината
Освен што планира да игра, Алвеш веќе работи на својата втора кариера како фудбалски агент, а следна цел му е стекнување професионална тренерска лиценца. Дали најтрофејниот фудбалер во историјата може да го препороди португалскиот нисколигаш, останува да видиме веќе во претстојната полусезона.
Гостинска статија на Марија Петровска
