Организаторите на престижниот ВТА 1000 турнир во Мадрид, кој ќе се одигра во периодот од 21 април до 2 мај, ги открија имињата на тенисерките кои ќе настапат со специјална покана. Шпанскиот медиум „АС“ предвреме ги објави листите за главната ждрепка и квалификациите, најавувајќи возбудлив спој на легендарни имиња и идни ѕвезди.
Венус Вилијамс повторно на земјена подлога
Најголемото изненадување на турнирот е учеството на легендарната Венус Вилијамс. Американската ветеранка, која сè уште е во потрага по својата прва победа во 2026 година, ќе се појави на турнир на земја за првпат по тригодишна пауза. Покрај неа, во главниот дел од турнирот се враќа и домашната ѕвезда Паула Бадоса, која поради падот на ранг-листата и проблемите со повредите мораше да се потпре на поканата од организаторите. Специјални покани за главната ждрепка добија и Ајла Томљановиќ, Викторија Хименез, Емилијана Аранго, Ашлин Кругер, Робин Монтгомери и Карлота Мартинез.
Мадрид како отскочна даска за новата генерација
Турнирот годинава става силен акцент на поддршката на младите таленти, особено во квалификациската фаза. Во центарот на вниманието ќе биде младата Французинка Ксенија Ефремова, која во јануари ја воодушеви јавноста со освојувањето на јуниорската титула на „Австралија Опен“. Својата шанса за пласман во главната фаза преку квалификациите ќе ја бараат и надежните Тајра Грант, Рут Роура, Хулиета Пареха, Наухани да Силва и Лаура Самсон.
Гостинска статија на Марија Петровска
