Навивачите на Филаделфија конечно можат да здивнат. По месеци неизвесност, стигна веста што сите ја чекаа: суперѕвездата Џоел Ембид најверојатно ќе биде подготвен за првиот натпревар од новата НБА сезона, против Бостон Селтикс следната среда.
Ова е огромно охрабрување за тимот кој минатата сезона, без својот најдобар играч, доживеа вистински колапс. Сепак, како што велат добро информираните НБА-инсајдери, неговото враќање доаѓа со една важна “цака”.
“Ќе биде на строг распоред, нема да игра секој натпревар”
Иако Ембид е блиску до враќање, па дури постои шанса да заигра и на последниот претсезонски натпревар, од клубот најавуваат дека ќе бидат екстремно внимателни со него. “Кога ќе се врати, ми кажаа дека ќе биде на многу строг распоред. Само затоа што се враќа, не значи дека ќе биде достапен за секој натпревар. Ќе бидат многу внимателни со него до крајот на сезоната”, изјави познатиот НБА-инсајдер, Крис Хејнс.
Ова значи дека Ембид сигурно нема да игра на “бек-ту-бек” натпревари (два натпревари во два дена), а веројатно ќе добива и дополнителен одмор во текот на сезоната, со цел да биде што е можно поздрав за плејофот.
Од МВП до само 19 натпревари: Проблемите со повредите се хронични
Ваквата претпазливост на Филаделфија е сосема разбирлива. Ембид, кој во 2023 година беше прогласен за МВП на лигата, со години се мачи со хронични повреди. Тој ги пропушти првите две сезони од својата кариера, а минатата сезона одигра само 19 натпревари, пред да замине на операција на коленото.
Статистиката е загрижувачка, откако пристигна во НБА во 2014 година, тој пропуштил повеќе од 400 натпревари.
Што значи ова за Филаделфија?
И покрај сè, враќањето на Ембид е најдобрата можна вест за Сиксерси. Дури и со ограничен број на натпревари, тој е играч кој може целосно да го промени изгледот на тимот. “Дури и кога играше на една нога, тој беше вистинска закана”, гласи еден од коментарите.
Ако успее да остане здрав и да одигра барем 50-60 натпревари, со помош на Пол Џорџ (кој исто така се враќа по повреда) и Тајрис Макси, Филаделфија повторно може да биде сериозен конкурент на Истокот.
