Турскиот “дијамант” и еден од најголемите таленти во светот на фудбалот, Арда Ѓулер, ја отвори душата во големото интервју за францускиот “Л’Екип”. Тој зборуваше за тешкиот почеток во Реал Мадрид, повредите, односот со Карло Анчелоти и соиграчите, како и за огромната амбиција што го движи напред.
По тешката прва сезона, обележана со повреди и мала минутажа, Ѓулер оваа сезона експлодираше и стана незаменлив дел од тимот на Чаби Алонсо.
“Кога не играв беше тешко, но тоа ја хранеше мојата амбиција”
Ѓулер признава дека периодот кога беше надвор од тимот бил исклучително тежок, но никогаш не се сомневал во своите квалитети. “Знаев дека сум во најголемиот клуб во светот. Но, уште од првиот тренинг, знаев дека имам квалитет да играм тука. Никогаш не се сомневав”, изјави Ѓулер.
“Кога не играв, беше тешко, но тоа само ја хранеше мојата амбиција. Го чекав својот момент”, додаде тој, откривајќи дека клучна улога во тој период имал поранешниот тренер, Карло Анчелоти.
“Карло е еден од најдобрите тренери во историјата. Не смееме да заборавиме дека тој ѝ кажа на јавноста дека јас ќе бидам еден од најдобрите играчи од средниот ред во светот. Тој секогаш се обидуваше да ми помогне и благодарен сум му за тоа.”
Врската со Мбапе и почитта кон Модриќ
Младиот Турчин зборуваше и за одличната соработка со првата ѕвезда на тимот, Килијан Мбапе. “На мене и на Мбапе понекогаш ни е доволен само еден поглед за да се разбереме на теренот. Нашите квалитети се надополнуваат”, вели Ѓулер.
Тој, исто така, откри како успеал да се избори за изведување на слободните удари, покрај сите ѕвезди во тимот. “Мислам дека ја заслужив почитта со ударите што ги вежбаме по тренинзите. Сепак, морав да најдам баланс. Ако играч како Модриќ дојдеше и сакаше да шутира, морав да му ја оставам топката без ниту еден збор.”
Целта е јасна: “Не ја освоив ЛШ, морам да ја освојам”
Иако Реал Мадрид ја освои Лигата на шампионите во неговата прва сезона, Ѓулер не се чувствува како дел од тој успех, бидејќи не играше. “Не ја освоив таа Лига на шампиони, не беше моја. Мора да освоиме нова. Тоа е една од моите главни цели”, изјави тој, покажувајќи го својот победнички менталитет.
На крајот, ова е приказна за едно момче кое, и покрај сите предизвици, созрева во вистинска ѕвезда пред нашите очи.
