Новата сезона во НБА лигата започна на најдобриот можен начин – со драма, спектакуларни индивидуални партии и две дерби пресметки кои ги оставија фановите без здив. Во Оклахома, шампионот го “преживеа” дебито на Кевин Дурент во дресот на Хјустон, додека во Лос Анџелес, ниту неверојатниот Лука Дончиќ не беше доволен за Лејкерс да го избегнат поразот од Голден Стејт.
Трилер во Оклахома: Шампионот се спаси по две продолженија, Шенѓун и Гилџес-Александер водеа “војна”
Вечерта во Оклахома започна свечено, со церемонија на доделување на шампионските прстени и подигнување на банерот. Но, потоа следуваше вистински трилер. Оклахома Сити Тандер и Хјустон Рокетс одиграа натпревар за паметење, кој беше решен дури по две продолженија, со победа на домаќините од 125:124.
Човек на одлука беше актуелниот МВП, Шај Гилџес-Александер, кој ги постигна победничките слободни фрлања на две секунди до крајот и го заврши натпреварот со 35 поени. Сепак, шоуто го украде турскиот центар на Хјустон, Алперен Шенѓун, кој одигра монструозен натпревар со 39 поени, 11 скокови и 7 асистенции.
Кевин Дурент имаше солидно деби за својот нов тим, постигнувајќи 23 поени и 9 скокови, но во клучните моменти, шампионот, предводен од Гилџес-Александер и одличниот Чет Холмгрен (28 поени), беше посмирен и стигна до првата победа.
Магија на Дончиќ во ЛА, но Вориорс се пресилни
Во Лос Анџелес, сите очи беа вперени во дебито на Лука Дончиќ во дресот на Лос Анџелес Лејкерс. И Словенецот не разочара. Тој одигра спектакуларен натпревар, постигнувајќи 43 поени, 12 скокови и 9 асистенции, но неговата магија не беше доволна за победа.
Голден Стејт Вориорс, иако без некоја блескава партија на Стеф Кари (23 поени), одиграа како тим и сосема заслужено славеа со 109:119. Клучна беше тимската игра на “воините”, каде што дури шест играчи постигнаа двоцифрен број на поени, а најефикасен беше Џими Батлер со 31 поен.
Лејкерс, кои настапија без повредениот Леброн Џејмс, немаа решение за одбраната на Вориорс, а покрај Дончиќ, единствено Остин Ривс (26 поени) беше на висина на задачата.
На крајот, ова беше совршен почеток на новата НБА сезона: полн со драма, неизвесност и индивидуални мајстории. Ако утрото по денот се познава, нè очекува долга и возбудлива сезона.
