Барселона се врати на победничките патеки во Ла Лига. Тимот на Ханси Флик славеше со 3-1 над храбриот Елче на „Олимпискиот стадион Луис Компањс“, со головите на Ламин Јамал, Феран Торес и Маркус Рашфорд.
По поразот во „Ел Класико“, Каталонците тргнаа во офанзива уште од првиот свиреж. Деветтата минута донесе ерупција на трибините – младиот Јамал доби топка од Балде и со прецизен удар ја погоди мрежата за 1-0. Само две минути подоцна, Фермин испрати совршен центаршут, а Феран Торес со волеј го постигна својот 50-ти гол во дресот на Барса за 2-0!
Сепак, Елче не се предаде. Во 41-та минута, Рафа Мир се ослободи на половината на Барселона и со прецизен удар ја намали предноста на 2-1.
Во второто полувреме гостите продолжија да создаваат шанси, а Мир дури ја погоди пречката во 50-та минута, но потоа следеше решавачки момент. Фермин испрати долга топка до Рашфорд, кој со одличен потег се ослободи од чуварот и со левицата ја затресе мрежата за 3-1 во 61-та минута.
До крајот, Елче уште еднаш ја погоди стативата, но Барса мирно го приведе мечот до крај. Флик им даде минути на Олмо и Левандовски, кои се вратија по повредите, во меч со висок интензитет и бројни прилики на двете страни.
Со оваа победа, Барселона стигна до осмата победа во првенството и повторно се доближи на пет бода од лидерот Реал Мадрид. Следи гостување кај Виго на 9 ноември, но пред тоа фокусот е на важниот дуел во Лигата на шампионите против Клуб Бриж.
