Комплетирано е 4. коло од новата лигашка фаза во Лигата на шампионите. Средата донесе доминација на Манчестер Сити, сигурна победа на Интер и хет-трик на Виктор Осимхен.
Сепак, вечерта ја одбележаа неверојатната драма во Белгија, каде Барселона трипати се враќаше за да спаси бод, „бомбата“ на Лазар Самарџиќ за победа на Аталанта, како и историскиот прв триумф на кипарскиот дебитант Пафос.
(Видео) Манчестер Сити 4-1 Борусија Дортмунд
„Граѓаните“ лесно ја решија „Халанд Боул“ пресметката. Фил Фоден беше „маестро“ со два гола, а Ерлинг Халанд (27. гол сезонава) рутински погоди против својот поранешен тим. Валдемар Антон намали, пред Рајан Шерки да стави точка на мечот.
(Видео) Клуб Бриж 3-3 Барселона
Какво лудило во Белгија! Барселона трипати губеше, и трипати се враќаше за да спаси бод. Карлос Форбс со два гола ги „убиваше“ Каталонците, но Ламин Јамал со соло-магија и Феран Торес одржуваа рамнотежа, пред автоголот на Цолис да ги постави конечните 3-3.
(Видео) Ајакс 0-3 Галатасарај
Вечер на Виктор Осимхен. Нигериецот го „уништи“ Ајакс среде Амстердам со класичен хет-трик. Погоди еднаш со глава по асистенција на Сане и потоа беше ладнокрвен од белата точка двапати (двата пенали поради игра со рака). Тој е само вториот играч на Галатасарај со хет-трик во ЛШ.
(Видео) Интер 2-1 Каират Алмати
Интер останува со перфектен скор (4/4). Тимот на Киву се намачи, но го скрши отпорот на Каират. Лаутаро Мартинез го отвори резултатот , Офри Арад го постигна првиот гол што Интер го прими оваа сезона во ЛШ , но Карлос Аугусто со проектил од далечина ја обезбеди победата.
(Видео) Марсеј 0-1 Аталанта
Натпреварот на „Велодром“ беше решен со чиста магија. Откако Де Кетеларе промаши пенал во раната фаза, мечот одеше кон 0-0. А потоа, во финишот, Лазар Самарџиќ влезе од клупата, „намести нишан“ и испали „бомба“ од 25 метри за огромна победа на Аталанта.
(Видео) Њукасл 2-0 Атлетик Клуб
Њукасл влезе во серија. Ова беше трета победа по ред (и трета чиста мрежа) во ЛШ. „Страчките“ славеа со голови со глава – прво Ден Барн по центаршутот на Трипие, а потоа и Жоелинтон по асистенција на Харви Барнс.
(Видео) Пафос 1-0 Виљареал
Историја на Кипар! Дебитантот Пафос ја забележа својата прва победа во историјата на Лигата на шампионите. Херој на тимот беше дефанзивецот Дерик Лукасен, кој погоди со глава веднаш по стартот на второто полувреме (46’) по корнер.
(Видео) Бенфика 0-1 Баер Леверкузен
Агонијата на Бенфика (и Жозе Мурињо) продолжува. Португалскиот тим сè уште е на нула бодови по 4 кола. Иако доминираа и ја погодија пречката, казната стигна кога Патрик Шик искористи лоша реакција на одбраната и со глава ги постави конечните 0-1.
Карабах 2-2 Челзи
Изненадување во Баку. Челзи се „лизна“ и освои само бод. Естевао донесе рано водство, но Карабах направи целосен пресврт (2-1) преку Андраде и пеналот на Јанковиќ. Алехандро Гарначо, кој влезе од клупата, успеа да израмни и да спаси бод за „Сините“.
