ТРАНСФЕР-ПАЗАР: Сагата околу иднината на словенечкиот ас, Бенјамин Шешко, добива нова димензија. Според информациите кои ги пренесува угледниот британски медиум “Скај Спортс”, Арсенал е сериозно заинтересиран за услугите на голгетерот, но неговиот клуб РБ Лајпциг поставил астрономска цена.
Германскиот клуб бара помеѓу 80 и 100 милиони евра (68.4 до 85.5 милиони фунти) за да се раздели со својот напаѓач.
Како што пренесува “Скај”, самиот Шешко е заинтересиран за преселба во Лондон, привлечен од можноста да игра во Лигата на шампионите, но нема да инсистира на трансфер по секоја цена и е релаксиран околу целата ситуација.
Арсенал долго време го следи 22-годишниот Словенец, кој минатата сезона експлодираше со 21 гол и 6 асистенции. Сепак, високата цена може да биде пречка, па клубот од Лондон ги разгледува и алтернативите, како што е напаѓачот на Спортинг, Виктор Ѓокереш. Останува да се види дали Арсенал е подготвен да плати ваква сума за да го донесе Шешко на “Емирати”.
