🏆 (Фото) Пресметките се на маса: Што му треба на Верстапен за да го помине Норис?

Сезоната 2025 во Формула 1 влегува во својата холивудска завршница! Остануваат само уште две трки (Катар и Абу Даби) и еден спринт (Катар).

Калкулаторите во гаражите на Мекларен и Ред Бул работат со полна пареа. Ландо Норис е во пол-позиција за својата прва титула, но актуелниот шампион Макс Верстапен не се откажува.

Моментална состојба:

1. Ландо Норис (McLaren) – 390 поени
2. Макс Верстапен (Red Bull) – 366 поени (-24)
3. Оскар Пјастри (McLaren) – 366 поени (-24).

Забелешка за Пјастри: Ако погледнете подобро, ќе видите дека Оскар Пјастри има исто бодови колку и Макс. Теоретски, истата оваа математика важи и за него. Но, да бидеме реални – Зек Браун веројатно ќе му ги сокрие клучевите од болидот или ќе му го исклучи моторот од боксот ако Оскар проба да го нападне Ландо во оваа фаза. Затоа, фокусот го ставаме на Макс. 😄

🧮 Математиката на Макс: Петте сценарија за пресврт

За Верстапен да стигне до петтата титула, му треба речиси перфектен финиш и малку „помош“ од Ландо. Еве ги петте сценарија прикажани на графиките:

• Сценарио 1 (Трилер во последен круг): Макс мора да победи СЕКАДЕ (Спринт + Катар + Абу Даби). Дури и ако Норис е солиден (2. во спринт, 6. во Катар, 2. во Абу Даби), Макс би победил со еден поен разлика (424 наспроти 423).
• Сценарио 2 & 3 (Победа на „гол-разлика“): Ако двајцата завршат со ист број на поени (424), титулата оди кај Макс Верстапен поради правилото на „countback“ (кој има повеќе победи во сезоната). За ова да се случи, Норис треба да завршува околу 3-то или 4-то место, додека Макс победува.
• Сценарио 4 (Катастрофа за Норис): Ова е кошмарот за Мекларен. Ако Норис не освои поени на главната трка во Катар (0 поени), на Макс му се отвора патот ширум. Во тој случај, дури и со победа на Макс, Норис ќе заостанува значително пред Абу Даби.
• Сценарио 5 (Макс не мора да е совршен, ако Ландо е лош): Дури и ако Макс е втор во спринтот, може да ја освои титулата ако победи на двете главни трки, а Норис има викенд за заборав во Катар (на пример, 7-мо место).

Важно: Нема веќе „џокер“ поен за најбрз круг!

За потсетување, оваа сезона 2025 важат новите правила. ФИА го укина дополнителниот поен за најбрз круг. Ова значи дека нема тактизирање во последниот круг – секоја позиција е финална.

Дали ќе гледаме чудо од „Летечкиот Холанѓанец“ или Ландо ќе издржи под притисокот? Катар ќе ни даде многу одговори!

Следете нè: Facebook | Instagram | X