Ова не е само кошарка. Ова не е само уште еден натпревар. Ова е натпревар број седум. Моментот на вистината, кога сè што е направено во текот на целата сезона се сведува на 48 минути чиста борба, срце и волја. Прашањето е речиси шекспировско – да се биде или не. Една вечер, еден натпревар, кој ќе одлучи сè. Кој ќе биде шампион – Оклохома Сити Тандер или Индијана Пејсерс?
На едната страна е славата, шампионскиот прстен и вечното место во спортските алманаси. На другата е празнината, горчливиот вкус на поразот и вечното прашање “што ако?”. Ова е ноќта која одлучува кој ќе биде испишан со златни букви во историјата, а чии соништа ќе бидат згаснати на последниот чекор до врвот. Нема поправен, нема утре. Победникот зема сè, додека поразениот оди во заборав.
Притисокот е огромен. Секој поглед, секој шут, секоја одбрана носи тежина на цела сезона. Арената врие, навивачите се на нозе, а на паркетот, хероите на денешницата се соочуваат со својата судбина. За ѕвездите на двата тима, ова е повеќе од натпревар – ова е тест за нивното спортско наследство.
За сите вистински вљубеници во спортот во Македонија, часовниците треба да се наместат за 02:00 часот по полноќ, кога започнува спектаклот. Токму тогаш, на најголемата сцена, се раѓаат легенди. Едните ќе го подигнат трофејот кон небото, додека другите ќе останат во сенката на историјата. Завесата е крената за последниот чин од оваа неверојатна спортска драма.
