Додека тенискиот свет бруеше за егзибицискиот меч наречен „Битка на половите“ помеѓу Ник Кирјос и Арина Сабаленка, една од најдобрите светски тенисерки Ига Швјонтек не беше импресионирана. Полската шампионка, позната по своите јасни ставови, порача дека ваквите настани се чиста забава која нема никаква допирна точка со вистинските вредности и социјални промени.
На прес-конференцијата за време на Јунајтед Купот, Швјонтек беше прашана за нејзиното мислење за дуелот во кој Кирјос славеше над нејзината голема ривалка Сабаленка, а нејзиниот одговор беше брутално искрен.
„Тоа е само забава, ништо повеќе“
Ига призна дека воопшто не одвоила време да го погледне натпреварот, нагласувајќи дека модерниот женски тенис веќе одамна ја поминал фазата во која треба да се докажува пред машката конкуренција.
„Не го гледав мечот, бидејќи не гледам такви работи. Сигурна сум дека привлече големо внимание, но тоа беше само забава. Не би рекла дека тоа имаше каква било врска со социјални промени или некои важни теми. Името беше исто како на мечот на Били Џин Кинг од 1973 година, но тука завршуваат сите сличности“, изјави Швјонтек.
Женскиот тенис е приказна за себе
Полската тенисерка смета дека женскиот тенис денес е доволно силен и атрактивен за да не мора постојано да бара споредби со машкиот тенис. Според неа, ерата на докажување „кој е подобар“ преку егзибиции е минато.
„Сметам дека женскиот тенис денес стои цврсто на своите нозе. Имаме толку многу одлични спортистки и прекрасни приказни кои можеме да ги претставиме, па нема потреба да се споредуваме со мажите. Тоа е сосема друга приказна. Всушност, сметам дека нема потреба од никаков натпревар помеѓу половите“, додаде Ига.
Јунајтед Купот е вистинскиот пат
Наместо „вештачки“ битки, Швјонтек го посочи Јунајтед Купот како идеален пример за тоа како тенисот треба да ги обединува мажите и жените во заедничка цел.
„Настани како овој, Јунајтед Купот, го обединуваат тенисот. Тука фановите на ВТА и АТП можат заедно да уживаат. Гледањето на сингл играчи како играат микс-дублови, што инаку немаат прилика да го прават, е она што го прави нашиот спорт поинтересен и подобар“, заклучи полската тенисерка.
