Легендарниот италијански стратег Фабио Капело, кој во својата богата кариера водеше гиганти како Милан, Реал Мадрид, Јувентус и Рома, упати остри критики кон состојбата со судењето во модерниот фудбал. Во интервју за шпанска „Марка“, 79-годишниот Капело не штедеше зборови, нарекувајќи ги судиите „мафија“ и нудејќи конкретно решение за проблемите со ВАР технологијата.
„Дон Фабио“ смета дека најголемиот проблем е што судиите немаат играчко искуство и не можат да ги препознаат природните движења на фудбалерите.
„Потребен е поранешен фудбалер во ВАР собата“
Според Капело, клучот за подобрување на одлуките лежи во вклучувањето на поранешни играчи во процесот на одлучување.
„Судиите се мафија. Не сакаат да вклучат поранешни играчи во ВАР, оние кои ги знаат движењата во фудбалот. Многу пати носат погрешни одлуки бидејќи не играле и не ги препознаваат тие движења. Играч ќе биде допрен по лицето, паѓа, а тие свират фаул. Зошто? Тоа ме излудува“, изјави Капело.
Тој откри дека со УЕФА анализирале 20 спорни ситуации за пенал. Кога ги прегледувале поранешни играчи и тренери, само 6 од нив биле оценети како пенали, додека судиите досудиле многу повеќе.
За Роналдо, Модриќ и „случајот Негреира“
Во истото интервју, Капело се осврна и на други теми. За него, Бразилецот Роналдо е најдобриот фудбалер што го тренирал, иако призна дека морал да го избрка од Реал Мадрид поради проблеми со тежината.
„Тој имаше 94 килограми. Му реков: ‘Рони, не можеш да имаш 10 кила вишок’. Но, тој беше генијалец, веднаш зад Пеле, Марадона и Меси,“ се присети Италијанецот.
Зборувајќи за денешниот Реал Мадрид, тој истакна дека на тимот му недостасува креативноста од ерата на Лука Модриќ, Тони Крос и Каземиро. За скандалот со Барселона и судиите („Случајот Негреира“), Капело иронично коментираше: „Се обидоа да нè запрат, но не можеа. Бевме посилни од сè“.
