Евертон има право да биде бесен. Панелот за клучни инциденти на Премиер лигата официјално потврди дека „Карамелите“ се оштетени во поразот од 1-0 против Арсенал на 20 декември.
Спорниот момент се случи во 57-мата минута кога дефанзивецот на Арсенал, Вилијам Салиба, влезе во дуел со напаѓачот на Евертон, Тиерно Бери. Панелот со гласање од 3-2 заклучи дека судијата Сем Барот згрешил што не досудил пенал, а ВАР судијата Мајкл Салисбери морал да го повика на монитор.
„Не ја удри топката, туку играчот“
Мнозинството од панелот смета дека ова било „јасна и очигледна грешка“.
„Салиба невнимателно го клоца Бери без да оствари контакт со топката“, стои во образложението на панелот.
Менаџерот на Евертон, Дејвид Мојс, не го криеше разочарувањето, истакнувајќи дека слични ситуации за други клубови резултирале со пенали.
„Се чувствува како некои клубови да ги добиваат тие одлуки, а други не. Гледав како на Фулам им даваат пенал за истото, а нам не,“ изјави Мојс.
Навивачите бесни: „ВАР е бесмислен!“
Одлуката на панелот предизвика лавина реакции кај фановите. Многумина сметаат дека ако петмина експерти гласаат 3-2, тогаш целиот систем е погрешен.
„Ова само покажува колку е тешко за судиите на теренот. Ако експерти со забавени снимки не можат да се договорат едногласно, што очекуваме од судијата во дел од секунда?“ коментираше еден навивач.
Други се поостри: „ВАР треба да се укине. Не помага, само ја убива емоцијата“. „Што му вреди ова на Евертон сега? Бодовите се изгубени“.
Панелот исто така потврди дека Њукасл бил во право да бара пенал против Челси, но дека тоа не било доволно за ВАР интервенција, додека црвениот картон на Чави Симонс (Тотенхем) против Ливерпул бил исправен.
