Нотингем Форест извојува клучна победа во битката за опстанок, славејќи на гости кај Вест Хем со 2-1 по вистинска драма во завршницата. Додека „шумарите“ конечно ги израдуваа своите навивачи со прв триумф по пет меча, кризата кај „чеканите“ стана алармантна, а тимот на Нуно Еспирито Санто сега нема победа на 10 натпревари по ред.
Натпреварот го реши контроверзен пенал во финишот, кој беше досуден по интервенција на ВАР, откако голманот Ареола наместо топката, со тупаница го погоди Морган Гибс-Вајт во лицето.
Автогол, поништен гол и пресврт
Вест Хем започна одлично и поведе уште во 13. минута. По еден одличен корнер на Самервил, Мурило неспретно реагираше и си ја затресе сопствената мрежа. Домаќините мислеа дека имаат 2-0 кога Самервил повторно погоди, но ВАР го поништи голот поради офсајд на новото засилување Тати Кастељанос.
Казната стигна експресно. Слично како и кај првиот гол, Форест израмни по корнер преку Николас Домингез, чиј прецизен удар со глава со лоб ефект заврши во мрежата.
Драмата со Ареола и ладнокрвниот Гибс-Вајт
Кога се чинеше дека бодовите ќе бидат поделени, голманот Алфонс Ареола направи катастрофална проценка. Обидувајќи се да исфрли една нафрлена топка, тој со цела сила го „нокаутираше“ Гибс-Вајт. Судијата по прегледувањето на снимката покажа на белата точка, а токму Морган Гибс-Вајт ја презеде одговорноста и ја донесе големата победа за гостите.
Нуно Еспирито Санто на „жешкото столче“
Притисокот врз Нуно Еспирито Санто сега е неподнослив. Поранешниот менаџер на Форест, кој сега го води Вест Хем, има освоено само 11 бода на 16 натпревари, што е најнизок скор за еден тренер на Вест Хем во ерата на Премиер лигата. Навивачите ги испратија своите миленици со жестоки свирежи, додека „чеканите“ тонат на 18-то место на табелата.
