Дека работите не одат на добро за Томас Франк во Тотенхем беше јасно и пред гостувањето кај Борнмут, но она што се случи пред почетокот на мечот дополнително го засили притисокот врз данскиот стратег. Франк беше фотографиран како на „Виталити“ стадионот шета со чаша за кафе со логото на Арсенал, најголемиот ривал на клубот што тој моментално го предводи.
Иако објаснувањето е дека чашата му била врачена од персоналот на стадионот (останата од гостувањето на Арсенал пред четири дена), навивачите на Спарс ова го дочекаа со нож. Во моменти кога тимот е на разочарувачкото 14-то место на табелата со само две победи во 12 меча, ваков превид се смета за недозволив аматеризам и непочитување на клупската традиција.
„Не би бил толку глупав“, Франк се брани од критиките
По натпреварот, Франк мораше да одговара на прашања кои немаат врска со тактиката. Тој изјави дека воопшто не го забележал логото и дека би било „комплетно глупаво“ свесно да направи такво нешто. Сепак, неговото оправдување дека фудбалот оди во погрешна насока ако се анализираат логоа на чаши, тешко дека ќе ги смири страстите кај фановите кои веќе подолго време бараат негова оставка.
Драма на теренот и нов пораз во 95. минута
Самиот натпревар беше само продолжение на агонијата за Тотенхем. Иако Матис Тел донесе водство уште во 5. минута, Борнмут успеа да направи пресврт. Жоао Палиња во 78. минута израмни на 2-2 и се чинеше дека Спурс ќе извлечат барем бод, но тогаш на сцена стапи Антоан Семењо. Во петтата минута од судиското продолжение, Семењо постигна драматичен гол за победа на Борнмут од 3-2, оставајќи го Тотенхем со празни раце и со менаџер чија иднина виси на конец.
