Во одложениот натпревар од 16-то коло на Серија А, Болоња славеше на гости кај Верона со 2-3, ставајќи крај на низата од седум натпревари без победа. Избраниците на Винченцо Италијано покажаа карактер, успевајќи да направат целосен пресврт по раното водство на домашните.
Шоу на Орсолини и Кастро
Натпреварот започна лошо за гостите кога Гифт Орбан во 14-та минута донесе водство за Верона по една брза контра. Сепак, одговорот на Болоња беше брутален. Само седум минути подоцна, Рикардо Орсолини постигна спектакуларен гол со својата препознатлива лева нога, сместувајќи ја топката во самиот агол од голот на Монтипо.
До крајот на првиот дел, Болоња направи целосен пресврт. Прво Јенс Одгард во 29-та минута прецизно погоди за 1-2, а пред самиот крај на полувремето, Сантјаго Кастро постигна вистински „проектил“, волеј кој од пречката заврши во мрежата за убедливи 1-3.
Драма до последната секунда
Во второто полувреме Верона се обиде да се врати. Во 71-вата минута, по еден центаршут на Орбан, Ремо Фројлер неспретно ја зафати топката и си постигна автогол за 2-3. Домаќините имаа неколку големи шанси за израмнување преку Сар и Гаљардини, но голманот Раваља со фантастична интервенција во 77-та минута ги спаси трите бода за Болоња.
Ова е прва победа за Болоња во Серија А уште од ноември, со која тимот конечно фаќа приклучок кон горниот дел на табелата, додека Верона останува во опасната зона со само еден позитивен резултат во последните пет кола.
