Манчестер Сити ја прекина агонијата на почетокот на 2026 година и по четири првенствени натпревари без триумф, конечно се врати на победите во Премиер лигата. Избраниците на Пеп Гвардиола рутински го совладаа фенерџијата Вулвс со 2-0, во меч во кој шпанскиот стратег направи храбри резови во составот.
Египетско-африканска комбинација за крај на кризата
По болниот пораз во градското дерби од Јунајтед и шокот во Лигата на шампионите од Бодо/Глимт, Гвардиола реши да ги одмори Халанд и Фоден. Довербата ја доби Омар Мармуш, а Египќанецот возврати уште во 6-та минута. По одличниот продор и центаршут на Нуњес, Мармуш мајсторски ја „закопа“ топката во мрежата за свој прв гол сезонава.
Победата ја запечати Антоан Семењо во судиското продолжение од првиот дел. Новото засилување од Борнмут, кое пристигна пред само две недели, го постигна својот веќе трет гол во дресот на Сити со прецизен удар од работ на шеснаесетникот. Семењо беше во центарот на вниманието и во второто полувреме, кога ја погоди рамката од голот.
Деби на Марк Геи и „чиста мрежа“ за Донарума
Она што најмногу ќе го радува Гвардиола е стабилноста во одбраната. Своето деби го имаше скапо платениот Марк Геи, кој дојде од Кристал Палас да биде „командант“ во дефанзивата. Гехи одигра беспрекорно, внесувајќи смиреност која му недостасуваше на тимот, а за малку ќе постигнеше и гол со глава уште во 5-та минута.
Џанлуиџи Донарума имаше релативно мирна вечер, иако мораше да интервенира при ударот на Москера, кој подоцна ја погоди и пречката. Вулвс, и покрај обидите на Роб Едвардс со замени во второто дел, останаа „заглавени“ на дното со само една победа цела сезона.
Притисокот сега е кај Арсенал
Со овие три бода, Сити ја намали разликата во однос на лидерот Арсенал на само четири бода. Утре сите очи на „синиот“ дел од Манчестер ќе бидат вперени кон „Емирати“, каде Јунајтед му гостува на Арсенал, а Сити се надева на услуга од својот лут ривал.
