Валенсија ја преживеа драмата против Еспањол и стигна до злато вредна победа од 3-2 на „Местаља“, со гол од пенал длабоко во судиското продолжение. И покрај тоа што прими два гола, македонскиот репрезентативец Столе Димитриевски повторно беше еден од хероите на „лилјаците“, одржувајќи го тимот во живот кога беше најтешко.
Натпреварот започна одлично за домаќините. Уго Дуро во 15-тата минута, по мајсторската асистенција на Лукас Белтран, донесе предност од 1-0, резултат со кој се замина на полувреме.
VALENCIA ALÉ 🦇#ValenciaEspanyol#LaLigaHighlights pic.twitter.com/vXzVhYRKTn
— Valencia CF (@valenciacf) January 24, 2026
Еспањол се враќаше двапати, Столе спасуваше
Второто полувреме донесе вистински огномет. Еспањол израмни преку Рамон Тератс во 54-тата минута (1-1). Само пет минути подоцна, дефанзивецот Ерај Џомерт ја врати предноста на Валенсија (2-1), но гостите не се предадоа.
Во 79-тата минута, несреќен автогол на Копете (по удар на Урко Гонзалес) донесе ново израмнување (2-2).
Во тие моменти, Еспањол притискаше за целосен пресврт, но на сцената стапи Столе Димитриевски. Македонскиот голман имаше неколку клучни интервенции, вклучувајќи ги одбраните на ударите на Кике Гарсија и Еду Експозито, со што ја сочува надежта за победа.
Рамазани за еуфорија
Кога се чинеше дека бодовите ќе бидат поделени, во 92-та минута Лукас Белтран беше фаулиран во шеснаесетникот. Одговорноста ја презеде Ларџи Рамазани и во 94-тата минута погоди за конечни 3-2 и ерупција на „Местаља“!
Ова е втора победа по ред за тимот на Карлос Корберан, со која Валенсија бега од опасната зона и се искачува на 13-тото место на табелата.
