Елина Свитолина ја приреди најголемата сензација на овогодинешното издание на Австралија Опен. Украинката, која игра како во транс од почетокот на јануари, буквално ја „збриша“ третата светска тенисерка Коко Гоф со неверојатни 6-1, 6-2 за само 59 минути игра на „Род Лејвер Арената“.
Свитолина како „ѕид“, Гоф во целосен очај
Додека Свитолина играше речиси безгрешен тенис, младата Американка преживуваше вистински кошмар. Гоф се мачеше со сервисот (пет двојни сервис грешки на почетокот), имаше проблеми со затегнатоста на жиците на рекетот, а фрустрацијата кулминираше со дури 26 непредизвикани грешки.
За Свитолина ова е десетта победа во низа во 2026 година, со што потврди дека моментално е можеби најдобрата тенисерка во светот.
По мечот, Гоф нервозно го напушти теренот, а потоа можеше да се види како го крши својот рекет. Многумина коментираа дека можеби токму несоодветниот рекет е виновен за толку слабиот перформанс на фаворитката, но сепак некој на нејзиното ниво на игра би требало да има барем неколку резервни рекети на теренот.
Coco Gauff giving her racquet the Sabalenka treatment post Svitolina loss. pic.twitter.com/9WiBxQ7aQ8
— asud (@asud683385) January 27, 2026
Враќање на „супер-мамата“: Од повреди и породилно до Грен слем врвот!
Овој успех на Свитолина има посебна тежина ако се погледне нејзиниот пат во последните неколку години. На 31-годишна возраст, таа го игра своето прво полуфинале во Мелбурн, покажувајќи неверојатна ментална и физичка сила.
Украинката имаше неколку долги паузи во кариерата, најпрво поради сериозни повреди, а потоа и поради најубавата причина, раѓањето на нејзината ќерка Скаи. Многумина ја отпишаа, но Свитолина се врати посилна, побрза и со „челични“ нерви, докажувајќи дека мајчинството не е пречка за врвен спорт.
Спектакл во најава: Свитолина против Сабаленка!
Со оваа победа, Елина Свитолина закажа мега-пресметка во полуфиналето против првата светска тенисерка, Арина Сабаленка. Белорусинката претходно лесно се справи со младата Ива Јовиќ, па нè очекува дуел на двете моментално најдоминантни тенисерки на турнејата.
Ако Свитолина го задржи ова ниво на „ладнокрвност“, Сабаленка ќе го има најтешкиот тест досега на патот кон одбрана на титулата.
