Астон Вила пропушти огромна шанса да остане во чекор со лидерот Арсенал, откако на домашен терен доживеа неочекуван пораз од Брентфорд со 0-1. Иако избраниците на Унаи Емери имаа играч повеќе повеќе од еден час, не успеаја да го скршат отпорот на жилавите „пчели“.
Херојски Брентфорд со играч помалку
Натпреварот тргна во полза на Вила кога Кевин Шаде заработи директен црвен картон поради груб старт над Кеш. Сепак, наместо доминација на домаќините, следуваше шок – Данго Уатара со фантастичен удар ја затресе мрежата на Вила и донесе водство за Брентфорд.
ВАР драма и поништениот гол на Абрахам
Вториот дел помина во знаци на опсада пред голот на извонредниот Келехер. Тами Абрахам, кој се врати во составот, постигна гол за израмнување, но по маратонска четириминутна ВАР проверка, истиот беше поништен бидејќи топката претходно излегла во аут. Ова е првпат по две години Астон Вила да загуби два домашни натпревари по ред, со што остана на седум бода зад Арсенал.
Палас извлече бод против десетмина од Форест
Нотингем Форест и Кристал Палас ги поделија бодовите (1-1) во натпревар кој го одбележаа црвени картони и повреди. Тимот на Шон Дајч поведе преку Морган Гибс-Вајт, но клучниот момент се случи пред полувремето. Неко Вилијамс доби директен црвен картон за играње со рака на гол-линијата, а Исмаила Сар беше прецизен од белата точка за 1-1.
Иако Палас имаше играч повеќе целото второ полувреме, тимот на Оливер Гласнер разочара – не упатија ниту еден шут во рамките на голот по одморот. Форест, и покрај тоа што го загуби голманот Матс Селс поради повреда, беше поопасен ривал до крајот, но не успеа да стигне до полн плен.
