Томас Мулер е во фаза на длабоко размислување, но една работа е јасна, неговиот „внатрешен мотор“ сè уште го движи страста за играта, а не желбата за мирно пензионирање. Германскиот „Раумдојтер“, кој по 25 години во Баерн Минхен минатото лето се пресели во Ванкувер Вајткепс, во искрено интервју за „Велт“ зборуваше за плановите за иднината, здравјето и враќањето во Минхен.
Мулер (36) во моментов се подготвува за својата прва целосна сезона во американската МЛС лига, а неговиот договор со канадскиот клуб истекува на крајот на 2026 година. Иако многумина очекуваат тоа да биде неговата последна станица, тој останува доследен на својот животен принцип: да не се обврзува непотребно.
„Подобро обична вода отколку коктел“
За Мулер, фудбалот сè уште е вреден за секоја жртва. Неговата изјава за дисциплината најдобро го опишува неговиот менталитет на врвен спортист дури и во четвртата деценија од животот.
„Можноста да решиш натпревар со пенал во 90-тата минута, да го почувствуваш тој притисок и да ги придвижиш емоциите на толку многу луѓе, тоа сè уште вреди за да си легнам порано. Тогаш нема да се напијам коктел, туку ќе земам обична вода“, вели Мулер.
Здравјето како единствен патоказ
Сепак, легендарниот офанзивец признава дека телото почнало да испраќа сигнали. Минатата предсезона за него била физички исцрпувачка, што го натерало сериозно да размислува за тоа колку уште може да го издржи овој ритам. За него, главниот мотив е задоволството, а ако телото не може да го следи тоа темпо, одлуката за крај ќе биде природна.
Без „седење на две столчиња“
Додека многу играчи на крајот од кариерата веќе полагаат за тренерски лиценци или почнуваат студии, Мулер одбива таков пат. Тој сака да биде 100% атлет додека е на теренот.
„Не сакам паралелно да се посветувам на тренерска лиценца или да почнам студии. Кога правам нешто, го правам со целосна пасија и енергија. Не сакам ниту себеси, ниту на другите да им нудам помалку од моето целосно внимание“, дециден е Германецот.
Баерн Минхен е „запишан“ во иднината
Иако ужива во Ванкувер, емотивната врска со Баерн е нераскинлива. Раководството на баварскиот гигант веќе има отворена покана за Мулер да се вклучи во работата на клубот по завршувањето на кариерата. Иако нема ништо „на хартија“, јасно е дека Мулер и Баерн во иднина повторно ќе чекорат по ист пат.
Дотогаш, ќе го гледаме како доминира во МЛС (каде веќе има 9 гола на 13 меча) и како стручен коментатор на MagentaTV за претстојното Светско првенство во 2026 година.
