Зимските тестирања во Бахреин, наместо само одговори за брзината, донесоа жестока војна со зборови која го подели падокот. Четирикратниот светски шампион, Макс Верстапен, не штедеше критики за новата генерација болиди за 2026 година, нарекувајќи ги „анти-тркачки“, додека неговиот најголем ривал и актуелен шампион, Ландо Норис, му порача дека „слободно може да се пензионира“ ако не му се допаѓа новата насока на спортот.
„Формула Е на стероиди“
Верстапен, кој е познат по својот „пуристички“ пристап кон тркањето, е скептичен кон фактот што новите правила (кои воведуваат 50-50 сооднос меѓу моторот со внатрешно согорување и електричната енергија) ги претвораат возачите во менаџери на батерии.
„Да бидам искрен, не е забавно да се возат овие болиди. Чувството не е како во Формула 1, туку како во некое издание на Формула Е на стероиди“, изјави Верстапен.
Неговиот проблем лежи во тоа што возачите сега мораат да применуваат специфични техники за да ја наполнат батеријата, како на пример менување во понизок степен на пренос среде свијок само за да се генерира енергија, или прерано отпуштање на гаста на правците.
„Јас сакам да возам со полна гас, а во моментов тоа не е можно. Сè се сведува на менаџирање, а тоа за мене не е чисто тркање“, додаде Холанѓанецот.
Норис не му остана должен: „Ни плаќаат премногу за да се жалиме“
Од другата страна на гаражата, Ландо Норис има сосема поинаков поглед. Британецот, кој минатата сезона во драматична завршница му ја прекина доминацијата на Макс, смета дека прилагодувањето на новата технологија е дел од работата.
„Мене ми е многу забавно. Формула 1 се менува постојано. Ни плаќаат премногу пари за да возиме за да можеме на крајот од денот да се жалиме. Ако некој сака да се пензионира, може слободно да го направи тоа. Никој не е присилен да биде тука“, гласеше одговорот на Норис.
За него, новите правила се само уште еден професионален предизвик за возачите и инженерите. „Секој има свое мислење. Нему не му се допаѓа, мене ми се допаѓа. Тоа е предизвик кој бара да размислуваш поинаку“, заклучи возачот на Мекларен.
Хамилтон и „премногу комплексните“ правила
Во дебатата се вклучи и Луис Хамилтон, кој застана на страната на возачите кои сметаат дека спортот станува премногу комплициран за обичниот гледач. Според седумкратниот шампион, правилата се толку сложени што „ниту еден фан нема да разбере што всушност се случува на патеката“.
Новата ера на Ф1 донесе три пати повеќе електрична моќ од претходно, активна аеродинамика и помали болиди, што според Верстапен е единствената позитивна промена.
Што е следно за Верстапен?
Критиките на Макс добиваат на тежина ако се знае дека неговиот договор со Ред Бул трае до 2028 година, а тој веќе неколку пати навести дека нема намера да остане во Ф1 ако исчезне уживањето во возењето. Тој веќе планира настап на „24 часа Нирбургринг“, потенцирајќи дека таму барем ќе може да вози со полна сила без да гледа во екранот за батеријата.
И покрај негодувањето за чувството зад воланот, Верстапен призна дека новиот проект на Ред Бул со сопствени мотори (во соработка со Форд) изгледа ветувачки и дека тимот е максимално мотивиран. Прашањето е само едно: Дали Макс ќе прифати да биде шампион во болид кој лично не го почитува?
