Тотенхем не чекаше долго. Само неколку дена по разделбата со Томас Френк, клубот од северен Лондон го потврди своето ново решение. Игор Тудор, 47-годишниот хрватски стратег, е именуван за привремен менаџер до крајот на сезоната.
Одлуката е јасна – на Тотенхем му треба „шок терапија“, а Тудор е познат токму по тоа: дисциплина, интензитет и резултати веднаш.
Nos complace confirmar el nombramiento de Igor Tudor como entrenador principal masculino hasta el final de la temporada, sujeto a permiso de trabajo. pic.twitter.com/Q8VS0p68YS
— Tottenham Hotspur (@Spurs_ES) February 14, 2026
Специјалист за „гасење пожари“
Спортскиот директор Јохан Ланге беше директен во образложението: „Игор носи јасност, интензитет и искуство за влегување во тешки моменти и правење итен импакт“.
И навистина, CV-то на Тудор го потврдува тоа. Хрватот е мајстор за преземање екипи на сред сезона и нивно кревање:
- Го однесе Марсеј до 3-то место и ЛШ во Франција.
- Ја презеде Лацио во март 2024 и обезбеди Европа.
- Имаше солидни епизоди во Верона и Јувентус (како играч е легенда, како тренер имаше потежок пат).
Што носи Тудор во Лондон?
За разлика од пасивниот стил на Френк кој ги иритираше фановите, Тудор е спротивното. Неговата филозофија е базирана на формацијата 3-4-2-1, висок пресинг и физичка доминација.
„Разбирам каква одговорност добив. Мојот фокус е јасен – да донесам конзистентност и натпреварувачки дух. Овој тим има квалитет, моја работа е да го организирам и да му дадам енергија,“ изјави Тудор на промоцијата.
Играчите на Тотенхем, кои беа критикувани за летаргија, сега ги чека „воениот режим“ на Тудор. Дали се подготвени за трчање? Ќе мораат да бидат.
Условите за работна дозвола се исполнети, а Тудор веднаш ги презема уздите со една цел: враќање на Тотенхем во европската елита.
