Управниот одбор на Фудбалската федерација на Македонија (ФФМ) денеска донесе одлука која навидум звучи одлично за домашниот фудбал, набавка на 15.000 до 20.000 нови столчиња за стадионите низ државата. Оваа иницијатива, наменета за клубовите од Првата, Втората и Третата лига, е несомнено чекор напред кон модернизација на руинираната инфраструктура и потег кој апсолутно го поздравуваме.
Секоја инвестиција во условите за игра и гледање е добредојдена. Но, додека ја гледаме оваа „шминка“ на стадионите, не можеме, а да не го поставиме суштинското прашање кое лебди над македонскиот фудбал: За кого ги местиме овие столчиња, ако навивачите ги нема?
Инвестиција во пластика или инвестиција во доверба?
Реалноста на ПМФЛ е сурова. Според нашите истражувања (за кои наскоро ќе објавиме детална анализа), македонската лига е една од најслабо посетените во Европа.
Парадоксот е очигледен дури и кај најголемиот бренд, ФК Вардар. Иако клубот граби кон својата 12-та титула, посетеноста на натпреварите е загрижувачки помала дури и во споредба со сезоните кога тимот се бореше за гол опстанок, па и од оние мачни години во Втората лига. Ако „Комитите“ и неутралната публика се ладат, што останува за другите?
Затоа, сметаме дека покрај инфраструктурата, ФФМ и клубовите мора итно да креираат Национална стратегија за враќање на публиката.
Безбедност и интегритет пред комфор
Нови столчиња се убава работа, но тие нема да го донесат родителот со дете на стадион ако тој не се чувствува безбедно.
- Безбедност: Насилството, националистичките испади и несигурноста ги бркаат најмладите и семејствата. Потребна е ригорозна контрола и едукација.
- Судење: Оваа сезона, социјалните мрежи „прштат“ од незадоволство кон судиските одлуки. Кога фановите се сомневаат во интегритетот на натпреварот и сметаат дека „сè е решено однапред“, тие остануваат дома. Враќањето на довербата во судиската организација е клучот за полни трибини.
Останати одлуки на УО на ФФМ
Покрај инфраструктурниот проект, ФФМ донесе и неколку други важни одлуки:
- Суспензија за ОФС Кичево: Поради кршење на Статутот, ОФС Кичево е суспендиран на две години.
- Крај за „двојните договори“: Федерацијата најави бескомпромисна борба против нелегалните договори меѓу играчите и клубовите, најавувајќи и известување до ФИФА.
- Бесплатен фудбал: Влезот за натпреварите на женската А репрезентација и У17 турнирот ќе биде бесплатен.
- Кадровски промени: Светозар Станковски е нов претседател на Натпреварувачката комисија.
Да заклучиме: Новите столчиња се одличен потег. Но, ако не се реши проблемот со довербата, безбедноста и квалитетот на фудбалот, тие столчиња ќе останат само тажен, нов, пластичен декор на празните македонски стадиони.
