Светското првенство во 2026 година и плеј-оф турнирот во март остануваат во Мексико. Претседателот на ФИФА, Џани Инфантино, изрази „целосна доверба“ во мексиканските власти, отфрлајќи ги сите шпекулации за можно преместување на натпреварите поради бранот насилство кој ја зафати државата Халиско по убиството на лидерот на картелот „Нова генерација“.
„Живееме тука, а не на Месечината“
Инфантино, во изјава за светските медиуми, нагласи дека ФИФА е во постојан контакт со претседателката на Мексико, Клаудија Шеинбаум, и дека безбедносната состојба внимателно се следи.
„Никој ништо нема да преместува. Имаме целосна доверба во властите во Мексико. Живееме во свет каде што се случуваат и добри и лоши работи. Не живееме на Месечината, туку тука. Мораме да се справиме со ситуациите и да се соочиме со нив. Мексико е фудбалска земја и сигурен сум дека сè ќе биде одлично“, изјави Инфантино.
Халиско е „жешката точка“, но „Естадио Акрон“ останува домаќин
Најкритично е во Гвадалахара, главниот град на државата Халиско, каде што на „Естадио Акрон“ треба да се играат четири натпревари од групната фаза на Мундијалот, но и клучните бараж-дуели кон крајот на март. Токму таму насилството беше најизразено како одмазда за убиството на „Ел Менчо“, при што животот го загубија најмалку 62 лица.
Иако неколку мечеви од домашното првенство беа одложени поради безбедносни ризици, ФИФА не отстапува од планот на овој стадион да ги пречека селекциите на Јамајка, ДР Конго и Нова Каледонија во борбата за последното место на СП.
Тестот со Исланд помина успешно
Како еден вид „генерална проба“ по немирите, мексиканската репрезентација вчера одигра пријателски натпревар против Исланд (победа од 4:0). Фудбалската федерација на Мексико по мечот извести дека сè поминало во најдобар ред и во безбедна атмосфера, што е клучен аргумент за Инфантино да не го активира „планот Б“.
Мексико е ко-домаќин на СП 2026 заедно со САД и Канада, а на нивна територија е предвидено да се одиграат вкупно 13 натпревари. Дали фудбалот ќе успее да го победи стравот од картелите, останува да видиме во претстојните месеци.
