Проектот на Цеск Фабрегас во Комо веќе не е само изненадување, туку сериозен кандидат за место во Лигата на шампионите. Сино-белите денеска го совладаа Лече со 3:1, покажувајќи карактер со пресврт уште во првото полувреме, а натпреварот ќе остане запаметен по првенецот на големото засилување Хесус Родригез.
Историско прво полувреме на „Џузепе Синигаља“
Комо не постигнал три гола во првите 45 минути на еден меч во Серија А уште од далечниот октомври 1987 година против Асколи. Денеска, навивачите на крајбрежјето на езерото Комо сведочеа на реприза на историјата.
Иако гостите од Лече шокираа со голот на Ласана Кулибали во раната фаза, избраниците на Фабрегас не паничеа. На сцената стапи младиот Хесус Родригез, кој прво асистираше до Тасос Дувикас за израмнување, а потоа и самиот се запиша во стрелците.
По многу обиди оваа сезона, Родригез конечно го постигна својот прв гол во италијанската елита, заобиколувајќи го голманот Фалконе за делириум на трибините. Точка на првиот дел стави дефанзивецот Марк-Оливер Кемпф со одличен гол со глава по лукавиот слободен удар на Да Куња.
Борба за ЛШ и повредата на Мората
Вториот дел помина во знакот на целосната контрола на домашните. Комо имаше неколку шанси преку Нико Паз и Асане Диао за уште поубедлив триумф, но резултатот остана непроменет. Сепак, сенка на големата победа фрли повредата на Алваро Мората во судиското продолжение. Искусниот напаѓач мораше предвреме да го напушти теренот по еден дуел во казнениот простор, што е сериозна грижа за Фабрегас пред полуфиналето од Купот против Интер.
Со оваа победа, Комо продолжува да ги предизвикува гигантите во горниот дел на табелата, докажувајќи дека победата над Јувентус и ремито со Милан не беа случајност.
