Македонскиот репрезентативен голман, Столе Димитриевски, одигра клучна улога во важната победа на Валенсија од 1-0 против Осасуна, во рамките на 26. коло од шпанската Ла Лига. Натпреварот на „Местаља“ донесе многу возбудувања, а сигурната партија на Димитриевски ги осигура трите бода за „Лилјаците“.
Рамазани јунак, Димитриевски бедем на голот
Мечот го одлучи еден единствен погодок во второто полувреме. Во 65-тата минута, Умар Садик изнуди пенал откако беше соборен од голманот на Осасуна, Серхио Ерера. Одговорноста ја презеде Ларџи Рамазани, кој мораше двапати да го изведува ударот од белата точка (поради прераното влегување на Хозе Гаја во шеснаесетникот при првиот обид). Рамазани покажа челични нерви и во 67-мата минута сигурно реализираше за 1-0.
По постигнатиот гол, Осасуна (тим кој неодамна го победи и Реал Мадрид) тргна во офанзива, фрлајќи сè на една карта. Гостите почнаа да испраќаат бројни центаршутеви и да се потпираат на прекини, внесувајќи високи играчи од клупата.
Токму во овие моменти до израз дојде класата на Столе Димитриевски. Македонскиот чувар на мрежата господареше во својот шеснаесетник, сигурно собирајќи ги високите топки и спречувајќи секаква надеж за израмнување на гостите.
Корберан воодушевен: „Неговата команда во шеснаесетникот беше вонсериска“
Тренерот на Валенсија, Карлос Корберан, не го криеше своето задоволство од настапот на македонскиот репрезентативец на прес-конференцијата по натпреварот.
„За мене, тоа што ја зачувавме мрежата чиста денес ни ги донесе трите бода. А перформансот на Димитриевски, сигурноста која ја пружи денес, беше извонредна. Игравме против тим кој испраќа многу центаршутеви и има голема висина кога треба да се браните во воздухот. Тие исто така имаа многу висина за прекините, секоја измена што ја направија ја зголемуваше нивната висина за да се обидат да капитализираат од тие ситуации,“ анализираше Корберан.
Шпанскиот стратег посебно ја истакна доминацијата на Димитриевски при воздушните дуели:
„Командата на Димитриевски во шеснаесетникот при воздушните ситуации беше, според мое мислење, извонредна. Многу сум среќен со неговиот настап. Денес бев многу задоволен од целокупниот настап на тимот, а особено од оној на Димитриевски.“
Оваа победа ја искачува Валенсија кон средината на табелата (во моментов на 14. место), давајќи му на тимот многу потребна самодоверба пред следниот домашен предизвик против Депортиво Алавес. За Димитриевски, ова е уште една потврда дека е еден од најсигурните голмани во шпанската елита.
