Шкендија успеа да ја запише планираната победа против Пелистер (2:1), но до трите бода стигна многу потешко од очекуваното. Битолчани одиграа партија за паметење и наместо како аутсајдери, на теренот се претставија како рамноправен противник кој до последната секунда го држеше фаворитот во неизвесност.
Шок на стартот и пресврт на „кралот“ Ибраими
Натпреварот започна со ладен туш за домашните навивачи. Уште во 7-та минута, искусниот Стефан Спировски ја затресе мрежата на Шкендија, а по консултација со ВАР собата, голoт беше потврден за шокантно водство на Пелистер од 0:1.
Овој момент ги разбуди избраниците на Шкендија, кои тргнаа во офанзива. Израмнувањето стигна во 21-та минута кога по еден корнер на Нзенге, најснаодлив беше Бесарт Ибраими, кој буквално со топката влезе во мрежата за 1:1.
Целосниот пресврт се случи во второто полувреме. По една брза контра по левата страна, Љатифи го пронајде Ибраими, а „десетката“ на тетовци со инстинктивна реакција по вторпат го совлада Јовчевски за водство од 2:1.
Драма во финишот: Пелистер пропушти шанси за бод
Наместо мирно да го приведат мечот до крај, фудбалерите на Шкендија влегоа во непотребни егзибиции, што замалку ќе ги чинеше скапо. Пелистер во последните десет минути тргна на сè или ништо.
Ивановски во 86-тата минута биеше крај самиот дирек, а Булатовиќ пропушти огромна шанса по еден атрактивен волеј. Во последните секунди од мечот, голманот Бабокар Геје стана херој на Шкендија, откако едвај го скроти ударот на Милојевиќ, спасувајќи чист гол и три бода за својот тим.
Најава за шампионско дерби во Скопје
Со овој триумф, Шкендија се доближи на само -4 бода во однос на лидерот Вардар. Ова е совршена увертира за следното коло, кога Шкендија патува за Скопје на директна пресметка со „црвено-црните“, натпревар кој веројатно ќе биде пресуден за тоа каде ќе заврши шампионската титула оваа сезона.
