Фудбалскиот свет е полн со легенди, но една од најнеобичните приказни во шпанската Ла Лига деновиве не доаѓа од теренот, туку од архивите на поп-музиката. Раководството на Селта Виго упати јавно и емотивно писмо до „кралицата на попот“, Мадона, со една необична молба: Да им помогне да го пронајдат легендарниот светлосин дрес што го носеше пред точно 36 години.
Фотографија што стана дел од историјата на Виго
Приказната нè враќа во јули 1990 година, кога Мадона, во рамките на својата култна турнеја „Blonde Ambition“, одржа концерт на стадионот „Балаидос“. Тогаш, во еден од највпечатливите моменти на вечерта, таа на сцената се појави облечена во домашниот дрес на Селта со бројот 5.
Таа слика на Мадона со „небесно-синиот“ дрес низ децениите стана вистински култ меѓу навивачите и симбол на градот Виго. Претседателката на клубот, Маријан Моурињо, во писмото објаснува дека тој момент не бил само случајност, туку чин на бунтовништво и уривање на нормите – нешто што ги дефинираше и Мадона и духот на клубот во тоа време.
Потрага по наследството на Хуан Мануел Еспиноса
Дресот што го носеше Мадона му припаѓаше на поранешниот фудбалер Хуан Мануел Еспиноса, кој за жал почина во октомври минатата година. Токму затоа, потрагата има и силна емотивна тежина. Клубот со години приватно се обидувал да му влезе во трага на ова парче облека, но сега решија потрагата да ја направат јавна.
„Овој дрес не е само обична ткаенина, тој е дел од нашето емотивно наследство“, напиша Моурињо во писмото до 67-годишната ѕвезда.
Специјален гест пред дербито со Реал Мадрид
И додека целиот свет чека дали Мадона ќе одговори или можеби ќе го најде дресот во својата огромна архива, Селта веќе подготвува изненадување. Овој петок, пред почетокот на големиот натпревар против Реал Мадрид, клубот ќе направи „гест на почит“ кон поп-иконата на својот стадион.
Дали дресот е сè уште во плакарот на Мадона или завршил кај некој среќен колекционер, останува да видиме.
