Победата над Вардар во минатото коло ја запали искрата кај тетовските „црвено-црни“. Шкендија сега заостанува само еден бод зад лидерот и денешниот натпревар против АП Брера (14:00 часот) е идеална прилика за продолжување на страшната пролетна серија.
Гаје: „Немаме право на грешка, научивме од лекциите во минатото“
Иако важат за големи фаворити, во Тетово нема место за опуштање. Чуварот на мрежата на Шкендија, Бабукар Гаје, потенцира дека клучот е во фокусот уште од првата секунда.
„Атмосферата е на врвно ниво, победите ни ја кренаа самодовербата. Но, во фудбалот не смееш никого да потцениш. Мораме да бидеме доминантни од почетокот, бидејќи во минатото правевме грешки кога дозволувавме противникот прв да поведе. Сега секој натпревар ни е како финале“, дециден е Гаје.
Брера доаѓа како голем предизвик
Струмичкиот тим на АП Брера е познат по тоа што знае да биде крајно незгоден кога игра без притисок, но Шкендија на домашен терен ретко испушта бодови кога е во ваква форма. Целта на тетовци е јасна – три бода и чекање „кикс“ на Вардар во Кратово за официјално преземање на првата позиција на табелата.
