Карлос Алкараз не планира да застане. Шпанскиот феномен ја продолжи својата совршена серија во 2026 година, запишувајќи ја 15-та победа по ред откако во осминафиналето го совлада Каспер Руд со 6-1, 7-6(2). Со овој триумф, Алкараз не само што обезбеди четвртфинале, туку стана и првиот тенисер во историјата кој стигнал до пет четвртфиналиња во Индијан Велс пред да наполни 23 години.
Прв сет од друга планета
Алкараз го започна мечот фуриозно. „Мојот прв сет беше нереален, играв на ниво кое е тешко да се повтори“, изјави Карлос по мечот. Со брејк уште во првиот гем и неверојатни лоб-удари кои го оставија Руд без одговор, Шпанецот го доби првиот сет за само триесетина минути.
Во вториот сет, Норвежанецот пружи силен отпор и не дозволи ниту една брејк топка, но во тај-брејкот магијата на Алкараз повторно пресуди. Со неколку „винери“ кои ќе бидат дел од најавните шпици, 22-годишниот ас ја запечати победата и закажа четвртфинале против Камерон Нори.
Медведев во топ-форма го чека Дрејпер
Ништо помалку убедлив не беше ниту Данил Медведев. Рускиот тенисер, кој е во серија од седум победи по ред по триумфот во Дубаи, го збриша младиот Американец Алекс Микелсен со 6-2, 6-4.
Медведев доминираше на свој сервис и вршеше константен притисок врз противникот, потврдувајќи дека е еден од главните фаворити за трофејот. Во четвртфиналето, Данил ќе се соочи со Џек Дрејпер, кој претходно приреди сензација елиминирајќи го Новак Ѓоковиќ.
