Женскиот дел од турнирот во Индијан Велс дојде до самата завршница. Во калифорниската пустина останаа само четирите најдобри, а денешните полуфинални пресметки ветуваат тенис на највисоко ниво. Сите погледи се вперени кон можна реприза на финалињата од Австралија Опен и Индијан Велс 2023, но патот до таму води преку две исклучително мотивирани противнички.
Сабаленка против младата Носкова: Битка на генерациите
Светскиот број еден, Арина Сабаленка, е на мисија конечно да го освои трофејот кој двапати ѝ побегна во финалињата (2023 и 2025). По супериорната победа над Мбоко, Арина вечерва ќе се соочи со Линда Носкова. 21-годишната Чехиња игра во животна форма и многумина во неа гледаат идна топ 10 тенисерка.
Интересно е што Сабаленка е мотивирана да ја прекине традицијата на овој турнир – имено, последните седум шампионки во Индијан Велс биле на возраст од 23 години или помлади. Сабаленка низ смеа изјави дека тоа ѝ е дополнителен мотив да покаже дека „ветеранките“ сè уште доминираат. Од друга страна, Носкова најави дека на мечот ќе му пристапи како да е прво коло, без страв од реномето на противничката.
Рибакина против Свитолина: Судир на различни стилови
Второто полуфинале ни носи пресметка помеѓу поранешната шампионка Елена Рибакина и препородената Елина Свитолина. Рибакина е во неверојатна серија, победувајќи на 27 од последните 30 мечеви, вклучувајќи ја и титулата на Австралија Опен оваа година. Нејзиниот сервис и разорните удари од основната линија се нејзиното најсилно оружје.
Сепак, Свитолина не е противничка која лесно се предава. Украинката, која во претходното коло ја елиминираше Ига Швјонтек, има израмнет меѓусебен скор (3-3) со Рибакина. Свитолина по тримесечната пауза се врати на терените со нов „оган“ во очите и многу поагресивна игра, што ветува неизвесен меч до последен поен.
