Оваа недела, повеќе од 114.000 членови на ФК Барселона ќе излезат на гласање за да го изберат претседателот кој ќе го води клубот до 2031 година. Изборот е сведен на две познати имиња: актуелниот лидер Жоан Лапорта и неговиот главен ривал, претприемачот Виктор Фонт. Иако клубот бележи успеси на теренот под водство на Ханси Флик, духот на еден човек сè уште лебди над „Камп Ноу“ – Лионел Меси.
Зошто Меси е клучната фигура?
Иако поминаа пет години откако Лео во солзи го напушти својот дом, неговото заминување останува најголемата дамка во мандатот на Лапорта. Виктор Фонт вешто ја користи оваа карта во својата кампања, ветувајќи го т.н. „Проект Меси“.
Фонт планира да изгради мостови со Аргентинецот, нудејќи му позиција на почесен претседател и шанса да одигра барем уште еден натпревар на преполниот „Камп Ноу“. Од друга страна, според извори на „The Athletic“, односот на Меси со Лапорта е практично непостоечки, што е сериозен удар за актуелниот претседател кој во 2021 година вети дека токму тој е единствениот кој може да го задржи Лео.
Лапорта е фаворит, но долговите се алармантни
Жоан Лапорта влегува во трката со силен ветер во грбот благодарение на одличните резултати на тимот. Домашната титула во 2023 година и фантастичната форма под водство на Флик се неговите најсилни адути. Неговиот слоган „Да ја одбраниме Барса“ (Defensem el Barca) таргетира на емоциите на навивачите.
Сепак, Виктор Фонт не молчи за финансиите. Тој потсетува дека долгот на Барселона е сè уште најголем во светот на фудбалот и изнесува фрапантни 1,45 милијарди евра. Фонт ги критикува познатите „лостови“ (palancas) на Лапорта, нарекувајќи ги „импровизации во последен момент“ кои ја ставаат под хипотека иднината на клубот.
Концептите на двајцата кандидати
Понудата на Жоан Лапорта се заснова на стабилност и континуитет. Тој ветува завршување на реконструкцијата на „Камп Ноу“ и тврди дека клубот наскоро ќе може да регистрира нови играчи без никакви административни пречки. Во неговиот спортски сектор, клучните фигури остануваат исти: Деко како спортски директор и Ханси Флик како предводник на тимот.
Од друга страна, Виктор Фонт нуди радикално нов модел. Неговиот план вклучува достигнување на рекордни приходи од 1,6 милијарди евра и целосно реструктуирање на спортското раководство. Фонт планира да го замени Деко со нови имиња како Карлес Планчарт и Алберт Пуиг, но јасно стави до знаење дека Ханси Флик ќе остане тренер на екипата и во неговиот мандат.
Факторот Ханси Флик
Интересен момент во кампањата е вклученоста на тренерот. Лапорта предупреди дека Флик би можел сериозно да ја преиспита својата иднина доколку дојде до промена на раководството. Иако Германецот беше дипломатски настроен на прес-конференциите, неговото присуство на настани на Лапорта сугерира каде лежи неговата поддршка. Деко, пак, беше подиректен – тој ќе остане во клубот само ако победи Лапорта.
Гласањето ќе се одржи в недела, на денот на натпреварот против Севиља, а резултатите ќе бидат објавени доцна во ноќта. Дали членовите ќе изберат продолжување на ерата на Лапорта или ќе му дадат шанса на новиот почеток на Фонт?
