Неделното попладне во Англија донесе два дијаметрално спротивни исходи. Додека Астон Вила на Унаи Емери чекори кон елитата на Европа, лондонски Тотенхем се соочува со најголемиот кошмар во својата модерна историја и реална опасност од испаѓање во Шампионшип.
Астон Вила 2 – 0 Вест Хем: Воткинс му одговори на Тухел
Астон Вила се врати на победничките патеки и ја зацврсти четвртата позиција на табелата. Клучниот човек беше Оли Воткинс, кој го прекина својот голгетерски пост токму откако беше изоставен од списокот на Томас Тухел за репрезентацијата на Англија.
Вила доминираше од самиот старт, а капитенот Џон Мекгин го отвори резултатот со прекрасен удар од работ на шеснаесеттникот по една добро воиграна акција од прекин. Победата ја потврди Воткинс во 68-та минута, реагирајќи најбрзо на еден одбиток. Со овој триумф, Вила оди на пауза со пет бода предност пред Ливерпул, додека Вест Хем останува „заглавен“ во зоната за испаѓање.
Тотенхем 0 – 3 Нотингем Форест: „Спарси“ се распаѓаат, Тудор пред отказ?
Вистинска катастрофа се случи во Северен Лондон. Тотенхем доживеа понижувачки пораз од директниот ривал за опстанок, Нотингем Форест, и сега се наоѓа на само еден бод над опасната зона. Тимот на Игор Тудор изгледаше целосно загубено, а хрватскиот стратег сега е под огромен притисок по петтиот пораз на неговите седум натпревари на клупата.
Игор Жезус го започна потопот на Тотенхем во финишот на првиот дел, а во второто полувреме Морган Гибс-Вајт и Таиво Авонији ставија точка на големата победа на „шумарите“. Ова е прв триумф за Витор Переира на клупата на Форест, со кој тимот избега на три бода од зоната за испаѓање. Навивачите на Тотенхем го испратија својот тим со гласни свирежи, свесни дека клубот може да испадне од елитата за првпат по 1977 година.
