Интер Мајами се подготвува за нова ера, а нејзиниот центар, очекувано, е човекот кој го промени фудбалот во Соединетите Американски Држави. Клубот официјално потврди дека на новиот импозантен стадион, источната трибина ќе го носи името на Лионел Меси, што е редок и уникатен случај во светот на спортот активен играч да добие вакво признание на сопствениот домашен терен.
Првиот натпревар на новиот „Ну Стадион“ е закажан за 4 април против Остин ФК, кога и официјално ќе биде промовирана „Трибината Лео Меси“. Оваа секција ќе ги опфаќа блоковите од 117 до 223, симболизирајќи ја нераскинливата врска меѓу Аргентинецот и навивачите кои во изминатите три години сведочеа на вистинска фудбалска револуција на Флорида.
A veces, ciertas cosas no deben esperar. pic.twitter.com/OfRwCiEXN6
— Inter Miami CF (@InterMiamiCF) March 27, 2026
Повеќе од обично признание
Одлуката на раководството на Интер Мајами не е само маркетиншки трик, туку искрена благодарност за сето она што Меси го направи откако пристигна од Париз во 2023 година. Со него во тимот, клубот стигна до трофеите во Лига купот, „Supporters’ Shield“ и титулата во МЛС купот минатата година.
„Признанието не значи секогаш затворање на едно поглавје. Понекогаш станува збор за свесноста дека во моментов сведочиме на нешто уникатно“, стои во емотивното соопштение на клубот.
Меси, кој веќе има 38 години, неодамна го продолжи договорот до крајот на 2028 година, а неговите бројки се застрашувачки: 82 гола и 53 асистенции, со што е убедливо најдобар стрелец и асистент во кусата историја на франшизата.
Додека тимот на Бекам се подготвува за преселба од стариот „Чејс стадион“ на новиот објект со капацитет од 26.700 седишта, едно е јасно – духот на Меси веќе е вграден во темелите на новиот дом на Мајами.
