Карлос Алкараз продолжува да гази на земјената подлога во Монте Карло. Шпанскиот ас и бранител на титулата денеска не само што избори пласман во полуфиналето, туку стигна и до импресивен јубилеј, односно својата 300-та победа во професионалната кариера. Жртва на неговиот разорен тенис беше непредвидливиот Александар Бублик, кој беше поразен со убедливи 6-3, 6-0.
Мечот кој на хартија ветуваше атрактивни потези, на крајот се претвори во целосна доминација на Алкараз, која траеше само 63 минути.
Серија од 10 последователни гема за целосен пресврт
Бублик започна во свој стил, агресивно и со неколку храбри удари успеа да направи пресврт во раната фаза на првиот сет, претворајќи го негативата од 0-2 во водство од 3-2. Сепак, тоа беше сè што видовме од тенисерот од Казахстан.
Алкараз го подигна нивото на игра, ги стабилизираше своите удари и започна неверојатна серија. Шпанецот ги освои следните 10 гема по ред, не оставајќи му ниту трошка надеж на противникот. Со 11 директни поени од форенд и максимално користење на 28-те неизнудени грешки на Бублик, Карлос покажа зошто е „крал“ на земјата.
„Одиграв одличен меч против непредвидлив играч, каде никогаш не знаеш што следи. Многу сум среќен за мојата 300-та победа и се надевам дека ќе ги има уште многу во иднина“, изјави Алкараз по триумфот.
Сè е подготвено за финалето од соништата
Алкараз во полуфиналето ќе се соочи со победникот од дуелот меѓу Алекс де Минор и домашниот херој Валентин Вашеро. Оваа победа ги одржува во живот сите навивачки надежи за „блокбастер“ финале меѓу Алкараз и Јаник Синер.
Трката за светскиот врв станува многу жестока, а доколку двајцата ривали се пласираат во неделното финале, шампионот на турнирот воедно ќе биде и Број 1 на АТП листата од понеделник.
