Јаник Синер продолжува да игра тенис од друга планета. Вториот светски тенисер денеска одржа вистински мастерклас на земјената подлога во Монте Карло, совладувајќи го третиот светски рекет, Александер Зверев, со убедливи 6-1, 6-4. Со овој триумф, Италијанецот се пласираше во своето прво финале на овој Мастерс, потврдувајќи дека во моментов игра во врвна форма.
Синер прикажа речиси совршен тенис, особено во првиот сет, каде што со разорни удари од основната линија и паметни излегувања на мрежа целосно го неутрализираше Германецот.
Осма победа во низа против Зверев
Ова беше осми последователен пораз за Зверев во дуелите со Синер. Германецот едноставно немаше одговор за моќта и прецизноста на Јаник. Италијанецот ги доби поените на мрежа во 12 од 16 обиди, а неговиот бекхенд по паралела го оставаше Зверев „закован“ за подлогата. Публиката во неколку наврати стануваше на нозе по спектакуларните винери на Синер кои доаѓаа дури и кога тој беше во дефанзивна позиција.
Статистиката е немилосрдна: дури 28% од првите сервиси на Синер останаа невратени, додека кај Зверев тој процент изнесуваше скромни 10%.
Stunning Sinner 😲@janniksin takes the opener 6-1 vs Zverev on Court Rainier III#RolexMonteCarloMasters pic.twitter.com/R6syTVQpMf
— Rolex Monte-Carlo Masters (@ROLEXMCMASTERS) April 11, 2026
Историјата е на дофат: Се чека расплетот за Број 1
Со оваа победа, Синер го продолжи својот нестварен победнички марш: 21 победа во низа на Мастерс 1000 турнирите (со сооднос на сетови 42-1) и 16-та победа во низа во оваа календарска година. Добиен е 16-тиот од последните 17 меча против тенисери од Топ 10.
Доколку Јаник Синер утре го подигне трофејот, тој официјално се враќа на првото место на АТП листата. Ако Карлос Алкараз го совлада Валентин Вашеро во второто полуфинале, утрешното големо финале ќе биде директен дуел „сè или ништо“ за светскиот трон.
Синер исто така има шанса да стане првиот тенисер по Новак Ѓоковиќ (2015 година) кој ги освоил првите три Мастерс турнири во една сезона (Индијан Велс, Мајами и Монте Карло).
