Ливерпул се надеваше на уште една магична европска ноќ и голем пресврт, но реалноста на „Енфилд“ беше сурова. Актуелниот европски шампион, Пари Сен Жермен, славеше со 2-0 и во реваншот, со што со вкупни 4-0 го обезбеди своето место во полуфиналето на Лигата на шампионите, каде ќе го чека победникот од дуелот меѓу Реал Мадрид и Баерн Минхен.
Главниот збор го имаше актуелниот освојувач на „Златната топка“, Усман Дембеле, кој со два гола во финишот ги скрши сите надежи на домашните навивачи и потврди дека ПСЖ во моментов е на едно друго ниво.
Коцкањето на Слот и повредата на Екитике
Менаџерот на Ливерпул, Арне Слот, изненади со стартната постава, давајќи му шанса на Александар Исак по долга пауза, додека Мохамед Салах повторно остана на клупата. Сепак, плановите на Слот се срушија уште во 30-та минута кога Хуго Екитике мораше да го напушти теренот поради повреда, по што „кралот“ Салах влезе во игра.
Иако Ливерпул изгледаше многу по енергично отколку во Париз, ПСЖ беше тој што ги имаше поконкретните шанси. Мамардашвили со неколку извонредни интервенции ги спречуваше Кварацхелија и Дембеле, додека на спротивната страна Маркињос со фантастичен старт спречи сигурен гол за домашните.
VAR контроверзи и мајсторијата на Дембеле
Клучниот момент се случи во 65-та минута. „Енфилд“ експлодираше кога судијата Маурицио Маријани покажа на белата точка по падот на Алексис Мек Алистер по дуелот со Вилијан Пачо. Сепак, по интервенција на VAR собата и прегледување на снимката, одлуката беше поништена, што беше почеток на крајот за „редси“.
Само седум минути подоцна, во 72-тата минута, Кварацхелија го пронајде Дембеле, кој со страшен удар од 20 метри го совлада Мамардашвили за 1-0. Тоа беше моментот кога стадионот замолкна, а надежите за пресврт згаснаа. Точка на мечот стави истиот играч во судиското продолжение, кога по асистенција на Баркола само ја смести топката во празната мрежа.
Крај на надежите за трофеј
По овој пораз, јасно е дека Ливерпул ќе ја заврши сезоната без ниту еден освоен пехар. За тимот на Арне Слот сега преостанува само борбата во Премиер лигата за да се обезбеди учество во елитното натпреварување и следната сезона. Од друга страна, ПСЖ на Луис Енрике гази сигурно кон одбрана на титулата, покажувајќи дека во моментов немаат достоен ривал во Англија.
