Формула 1 доби нова техничка разрешница која директно ги погодува двата водечки производители на мотори. Меѓународната автомобилистичка федерација (ФИА) официјално го забрани „софтверскиот трик“ со кој Мерцедес и Ред Бул добиваа дополнителна моќност на крајот од квалификациските кругови.
Станува збор за искористување на „дупка“ во правилата поврзана со хибридниот систем (MGU-K), која им овозможуваше на возачите да ја поминат целната рамнина со максимална брзина, избегнувајќи го задолжителното намалување на енергијата.
Како функционираше „мамењето“?
Според правилата, кога батеријата се празни на долгите правци, болидите мора постепено да ја намалуваат моќноста (за околу 50kW во секунда) за да се избегне нагло губење на брзината. Сепак, инженерите на Мерцедес и Ред Бул пронајдоа начин целосно да го исклучат овој систем токму пред целта.
Иако ова значеше дека хибридниот систем ќе биде „заклучен“ во наредните 60 секунди, тоа не им претставуваше проблем во квалификациите, бидејќи кругот веќе беше завршен, а болидот се враќаше во боксот. Овој трик им носеше предност од 50 до 100 коњски сили во последните метри, разлика која често одлучуваше за пол-позиција.
Опасност на патеката и реакција на Ферари
Ривалите, предводени од Ферари, први го забележаа ова во Австралија, но проблемот кулминираше во Јапонија. Поради исклучувањето на системот, болидите на Макс Верстапен и Кими Антонели буквално „заглавуваа“ на патеката по завршување на кругот, движејќи се опасно бавно додека другите возачи зад нив биле во полна брзина.
Алекс Албон со Вилијамс дури и целосно застана на патеката во Сузука поради компликации предизвикани од овој софтверски режим. Ферари побара итно појаснување од ФИА, нагласувајќи дека ваквата пракса е безбедносен ризик.
The FIA has banned a Mercedes and Red Bull engine trick which gave them extra power over rivals: pic.twitter.com/PW1ARksxXR
— The Race (@wearetherace) April 14, 2026
Одлука на ФИА: Само за итни случаи!
Во најновите технички документи испратени до тимовите, ФИА јасно стави до знаење дека функцијата за исклучување на MGU-K системот смее да се користи исклучиво во итни ситуации (дефект или опасност од пожар), а не како средство за зголемување на перформансите.
ФИА сега ќе ги проверува податоците по секоја квалификациска сесија. Доколку некој тим го исклучи системот на крајот од кругот, ќе мора да докаже дека имал реален технички дефект, во спротивно ќе следат ригорозни казни.
