По шокантната вест дека легендарното дуо на Ред Бул се распаѓа, Макс Верстапен конечно проговори за заминувањето на неговиот тркачки инженер, Џанпјеро Ламбијазе (GP). Иако многумина очекуваа разочарување кај светскиот шампион, Макс покажа дека пријателството му е поважно од сопствениот комфор на патеката.
Верстапен откри дека Ламбијазе лично го побарал за совет пред да ја прифати понудата од Мекларен, која финансиски и професионално била премногу добра за да се одбие.
„Веќе постигнавме сè заедно“
Верстапен, кој со Ламбијазе доминираше во Ф1 светот со четири последователни титули, призна дека „гласот во неговите слушалки“ барал еден вид дозвола за да го направи големиот чекор кон Вокинг.
„Тој ми кажа каква понуда добил. Мојот одговор беше: ’Би бил глупав ако не го прифатиш тоа’. Ние веќе постигнавме сè заедно. А потоа тој добива таква одлична понуда, исто така имајќи го предвид неговото семејство и сигурноста што таа би му ја дала. Ме праша за еден вид дозвола и му реков дека апсолутно мора да го направи тоа. Тој навистина сакаше да го слушне тоа од мене“, изјави Верстапен.
Крај на една ера во интерес на пријателството
Изјавата на Макс само го потврдува она што сите во падокот го знаеја дека Ламбијазе не беше само вработен во Ред Бул, туку „штитот“ на Макс. Нивната соработка беше клучна во најинтензивните трки, а Макс често знаеше да каже дека не може да замисли да работи со друг инженер.
Сепак, во моменти кога Ред Бул се соочува со сериозен егзодус на кадри (Маршал, Кортнеј, а сега и Ламбијазе), Макс одлучи да не биде себичен. Обезбедувањето на иднината на семејството на Ламбијазе и новата сениорска функција во Мекларен беа аргументи пред кои Верстапен не сакаше да стои на патот.
Ламбијазе ќе се пресели во Мекларен најдоцна до 2028 година, а дотогаш, Макс ќе мора да пронајде нов сојузник во болидот на Ред Бул кој ќе може да се носи со неговиот карактер и високи барања.
