Драмата во плеј-ин турнирот заврши со две доминантни партии на домашните екипи. Феникс Санс успеа да го преживее притисокот и да ги елиминира „Воините“, додека Орландо Меџик покажа дека нивната млада екипа е подготвена за големата сцена по убедливиот триумф над Шарлот.
Џејлен Грин блесна, Кари застана на „ѕидот“ на Санс
Феникс Санс – Голден Стејт Вориорс 111:96
Феникс Санс ја обезбеди осмата позиција на Западот во натпревар кој го одбележа фантастичниот Џејлен Грин. Младиот бек постигна 36 поени (8 тројки), покажувајќи дека е подготвен да биде лидер во клучните моменти. Девин Букер додаде 20 поени, но неговиот настап заврши со исклучување по жестока вербална расправија со Дрејмонд Грин во финишот на мечот.
Од друга страна, Стеф Кари имаше вечер за заборав. Одбраната на Феникс беше фокусирана само на него, принудувајќи го на очајни 4-од-16 од поле за скромни 17 поени. Кристапс Порзингис, иако играше со повреда на зглобот, не успеа да помогне повеќе од своите 11 поени. Санс во првата рунда од плеј-офот ги чека пеколна серија против актуелниот шампион, Оклахома Сити Тандер.
„Меџик“ доминираше во Орландо: Шарлот „прегазен“ со 31 разлика
Орландо Меџик – Шарлот Хорнетс 121:90
Орландо Меџик трета година по ред е дел од елитата, а синоќешниот настап против Шарлот беше демонстрација на сила. Паоло Банкеро со 25 поени и Франц Вагнер со 18 ги предводеа домаќините до убедлива победа, во натпревар кој беше решен уште пред полувремето кога предноста достигна +35.
Тренерот Џамал Мосли успеа да го наметне својот стил, целосно исфрлајќи го Шарлот од ритам. Хорнетс изгледаа како тим кој едвај чека да заврши сезоната, што го истакна и легендарниот Стен Ван Ганди во својот коментар во живо. Наградата за Орландо е првата рунда против првиот носител на Истокот, тимот на Детроит Пистонс.
