Елена Рибакина потврди дека се наоѓа во застрашувачка форма на почетокот на оваа сезона. Втората светска тенисерка доминираше на силниот турнир во Штутгарт, совладувајќи ја Каролина Мухова во големото финале со убедливи 7-5 и 6-1, по само еден час и 18 минути игра на земјената подлога во сала.
За 26-годишната претставничка на Казахстан, ова е веќе втора голема титула во 2026 година, откако претходно во јануари триумфираше и на Австралија Опен.
Силна борба само во првиот сет
Натпреварот започна со голема неизвесност. Чешката тенисерка Мухова, која и самата имаше одличен почеток на годината со титулата во Катар, пружи силен отпор во првиот сет. Сепак, при резултат 5-5, Рибакина успеа да го направи клучниот брејк и да го затвори сетот со 7-5.
Овој момент целосно ја скрши самодовербата кај Мухова. Во вториот сет на теренот постоеше само една тенисерка – Рибакина го подигна нивото на својот сервис и со агресивни удари експресно го доби сетот со 6-1, не оставајќи и никаква шанса на противничката.
„Сакам да му кажам едно големо благодарам на мојот тим. Без вас ова немаше да биде возможно. Ви благодарам што секогаш ме притискате да бидам подобра и да напредувам секој ден“, изјави емотивната Рибакина по мечот.
Традицијата со автомобилот: Сега конечно со возачка!
Турнирот во Штутгарт е познат по тоа што покрај паричната награда и трофејот, победничката добива и луксузен автомобил од главниот спонзор „Порше“. Ова е втора титула за Рибакина во овој град (првата ја освои во 2024 година), но овој пат работите се поинакви.
Кога победи пред две години, Рибакина стана мета на шеги во тенискиот свет бидејќи не можеше сама да го одвезе автомобилот од теренот бидејќи во тој момент немаше возачка дозвола. Сега, како искусна шампионка, таа со насмевка позираше пред новиот спортски модел кој ќе го пополни нејзиниот возен парк.
The driver’s seat suits you much better! 😍
— Porsche Tennis (@PorscheTennis) April 19, 2026
911 Carrera S Cabriolet (WLTP): Fuel consumption combined: 10,6 – 10,4 l/100 km; CO₂ emissions combined: 240 – 235 g/km; CO₂ class G; Status 04/2026 pic.twitter.com/fP8MPyRYp6
За Каролина Мухова овој пораз боли, но финалето во Штутгарт и гарантира голем скок на ВТА листата, каде сега ќе се наоѓа на прагот на влезот во топ 10 најдобри светски тенисерки.
