Пред точно десет години, светот беше сведок на најголемото спортско чудо во историјата. Лестер Сити, тимот за кој обложувалниците нудеа коефициент 5.000-1, ја освои Премиер лигата. Денес, истиот тој клуб се соочува со суровата реалност – следната сезона ќе игра во Лига 1 (третиот ранг на англискиот фудбал).
Ремито против Хал Сити (2-2) изминатиот вторник стави печат на една од најтажните деградации во модерниот фудбал. Лестер стана првиот англиски шампион кој за само десет години успеал да го допре небото и да падне во третолигашката кал.
Падот кој започна со празни авиони
Иако во 2021 година „лисиците“ го подигнаа ФА Купот и играа полуфинале во Конференциската лига, пукнатините веќе беа видливи. Пандемијата на Ковид-19 зададе смртоносен удар врз бизнисот на сопственикот Вичај Шриваданапраба, империјата „King Power“ која се занимава со duty-free продажба на аеродромите.
Со запирањето на летовите, запре и приливот на пари. Брендан Роџерс прв предупреди дека клубот мора да ги смени очекувањата. Од борба за Лигата на шампионите, Лестер наеднаш се најде во борба за 40 бода. Кога Роџерс замина во 2023 година, хаосот стана непоправлив.
Седум менаџери за три години: Губење на идентитетот
Од заминувањето на Роџерс, Лестер смени дури седум менаџери. Клубот луташе од стил во стил, без никаква визија. Енцо Мареска накратко ја врати надежта со титулата во Чемпионшип во 2024 година, но неговото заминување и катастрофалните епизоди со Стив Купер и Руд ван Нистелрој (кој победи на само 5 од 27 меча) го докрајчија тимот.
Последната грешка беше ангажманот на Гери Ровет. Лестер под негово водство изгледаше како „раштиман оркестар“, а казната од шест бода поради прекршување на финансиските правила во февруари беше само последната шајка во ковчегот.
Духот на Вичај и тешкото бреме на неговиот син
Многумина сметаат дека Лестер никогаш не закрепна од смртта на Вичај Шриваданапраба во хеликоптерската несреќа во 2018 година. Тој беше човекот со став „заврши ја работата“, лидер кој го извади клубот од долгови и го однесе до врвот на светот.
Неговиот син, Ајават (познат како „Топ“), се најде во невозможна ситуација. На само 33 години мораше да ја води мултимилијардерската компанија во сред светска криза и да го менаџира фудбалскиот гигант кој неговиот татко го изгради. „Топ“ досега отпиша стотици милиони фунти долгови, но финансискиот „слободен пад“ е премногу голем дури и за него.
Финансиски пекол во Лига 1
Лестер во третата лига влегува со највисока плата во историјата на тој ранг. Играчи како Хари Винкс, Рикардо Переира и Патсон Дака имаат астрономски договори кои се неодржливи за Лига 1.
Додека нивните ривали ќе бидат тимови како Бромли, клуб кој 132 години од своето постоење ги поминал во аматерските лиги, Лестер ќе располага со тренинг центар од 85 милиони фунти, но со буџет кој мора да се скрати за 60%.
Leicester City’s 85 million pound, world class training facility, all ready for third division football next season…
— The Away Fans (@theawayfans) April 21, 2026
😬😭pic.twitter.com/UkUqV8cHzy
Пораката на сопственикот: „Нема изговори“
По официјализацијата на испаѓањето, Ајават Шриваданапраба се обрати до навивачите со емотивно писмо:
„Испаѓањето во Лига 1 е потврдено. Како претседател, таа одговорност е моја. Нема изговори. Ги искусивме највисоките врвови, а сега ги допираме најниските длабочини. Искрено ми е жал за разочарувањето што го предизвикавме“.
Лестер Сити во 21-виот век е вистински емотивен „ролеркостер“. Од администрација и банкрот во 2002, до титула во 2016, и сега повторно во третата лига во 2026. Навивачите се скршени, но како што вели „Топ“ – сега преостанува само борбата да се вратат стандардите кои овој клуб ги заслужува.
