Фудбалерите на Барселона ја продолжуваат својата доминација во Ла Лига и по вечерашната победа над Селта Виго со 1-0. Иако Реал Мадрид претходната вечер славеше над Алавес и се обиде да го зголеми притисокот, избраниците на Ханси Флик одговорија на најдобар можен начин – со нови три бода кои ја задржаа предноста од девет поени на врвот на табелата.
Со само шест натпревари до крајот, 29-та титула е веќе на повидок, но „Камп Ноу“ синоќа не беше исполнет само со радост, туку и со голема загриженост за здравјето на најголемиот бисер на тимот.
Пенал за победа и шок за навивачите
Клучниот момент на натпреварот се случи во 40-та минута. Ламин Јамал беше соборен во казнениот простор, по што самиот ја презеде одговорноста. Тинејџерот ладнокрвно го совлада Раду за водство од 1-0, но во моментот на шутот се случи нешто неочекувано.
Јамал веднаш се фати за ногата и падна на тревата со болна гримаса. По извршената интервенција, младиот ас мораше да го напушти теренот со помош на медицинскиот тим. Ова е втор голем удар за Флик на овој меч, бидејќи претходно поради повреда на бутниот мускул теренот го напушти и Жоао Кансело.
Прекин поради медицинска итност на трибините
Натпреварот во првиот дел беше накратко прекинат на речиси половина час. Причината не беше фудбалска, на еден од гледачите на трибините му се слоши, па медицинските екипи на двата тима веднаш интервенираа за да му помогнат на навивачот. По паузата, фудбалот продолжи, а Барса успеа да ја сочува својата предност.
ВАР го поништи голот на Феран
Во второто полувреме Барселона целосно ја контролираше играта. Феран Торес постигна прекрасен погодок со волеј по асистенција на Педри, но по долга проверка во ВАР собата, голот беше поништен поради сомнителен офсајд.
Селта, која се бори за излез во Европа, се обиде во финишот да го загрози голот на одличниот Јоан Гарсија, но одбраната на Барса беше на висина на задачата. Со овој триумф, Барселона го задржа стопроцентниот учинок на домашен терен оваа сезона.
