Конечно е комплетиран мозаикот за нокаут-фазата во најелитното европско кошаркарско натпреварување. АС Монако е последниот патник во плејофот на Евролигата за сезоната 2025/26, откако во решавачкиот „плеј-ин“ дуел славеше над Барселона со 79-70.
Ова е голем триумф за младиот стратег Манучар Маркоишвили, кој откако ја презеде функцијата главен тренер во март, успеа да го однесе тимот до шестта последователна домашна победа и да го завери билетот за пресметката со првопласираниот Олимпијакос.
Монако ја издржа офанзивата на Барса
Натпреварот во салата „Гастон Медесин“ започна со израмнета борба, сè додека домаќините не направија серија од 11-0 во првата четвртина, со која се одлепија на двоцифрена предност. На паузата Монако замина со комотни 49-35, но Барселона покажа заби во второто полувреме.
Каталонците со цврста одбрана во третиот период го намалија дефицитот на само седум поени (56-49), но тимот на Маркоишвили во клучните моменти го покажа својот карактер. Даниел Тајс со 16 поени и Ели Окобо со 14 беа клучните алки во нападот, додека Мајк Џејмс запиша дабл-дабл учинок со 13 поени и 10 асистенции.
Формирани сите парови: Патот до Белград започнува на 28 април
Со триумфот на Монако, официјално е познат костурот за плејофот. Олимпијакос како лидер ќе ја има предноста на домашен терен против Монако, додека Панатинаикос, кој преку плеј-инот стигна до седмото место, ќе се соочи со втората Валенсија.
Плејоф парови (Best-of-five):
- Олимпијакос (1) – АС Монако (8)
- Валенсија (2) – Панатинаикос (7)
- Реал Мадрид (3) – Хапоел Тел Авив (6)
- Фенербахче (4) – Жалгирис Каунас (5)
Распоред на натпреварите
Плејоф возбудувањата започнуваат на 28 април со три натпревари: Фенербахче против Жалгирис, Олимпијакос против Монако и Валенсија против Панатинаикос. Актуелниот шампион Реал Мадрид својот прв меч против Хапоел ќе го одигра на 29 април.
Доколку некоја серија стигне до одлучувачкиот петти натпревар, термините за „мајсторката“ се закажани за 12 и 13 мај. Финалната четворка оваа година ќе се одржи во Белград, каде ќе се круниса новиот владетел на Европа.
