Светот на кошарката остана во неверување по неверојатната низа во втората четвртина на третиот меч помеѓу Лејкерс и Хјустон. Она што го видовме не беше само кошарка, туку историски момент каков што НБА досега нема забележано – заеднички „heat check“ на татко и син во сред плејоф натпревар.
Иако Лејкерс играат без суперѕвездите Лука Дончиќ и Остин Ривс, Леброн Џејмс ја презеде целата контрола, но овојпат со помош на својот син, Брони Џејмс.
Девет поени за историја
Целата секвенца траеше само неколку минути, но беше доволна за социјалните мрежи да „експлодираат“. Сè започна со препознатливиот тежок шут на Леброн од левото крило на истек на нападот. Веднаш потоа, Брони го постигна својот прв плејоф кош во кариерата – тројка по блок токму од неговиот татко.
Но, врвот на вечерта беше контранападот кој вечно ќе остане во архивите: Леброн фрли спектакуларен лоб, а Брони го заврши со акробатско положување. Ова беше првата асистенција од татко на син во историјата на НБА плејофот.
„Дали некогаш сме виделе заеднички ‘heat check’ на татко и син? Мислам дека штотуку бевме сведоци на тоа. Неверојатно“, напиша Сем Квин од CBS на платформата X.
Светот воодушевен од „Кралот“ и неговиот наследник
Реакциите не стивнуваат од сите страни. Аналитичарот Ник Рајт го опиша моментот како еден од „најкул“ моментите во поновата НБА историја, додека новинарите на ESPN и Associated Press останаа без зборови пред атлетицизмот на младиот Брони.
Оваа серија од 9-0 предводена исклучиво од семејството Џејмс им донесе на Лејкерс двоцифрена предност на полувремето, која подоцна ја претворија во клучна победа за водство од 3-0 во серијата. По повредите на Дончиќ и Ривс, надежта на Лејкерс изгледаше мртва, но Леброн и Брони вечерва покажаа дека со семејна магија, сè е можно.
