Улиците на Кнежевството викендов се претворија во најголемиот музеј на тркала во светот. 15-то издание на „Grand Prix de Monaco Historique“ заврши во неделата со серија од осум возбудливи трки, кои ја запалија страста кај рекордната публика која ги преполни трибините покрај легендарната патека.
Овогодинешното издание, кое го славеше богатото наследство на мотоспортот, помина во знакот на доминацијата на Стјуарт Хал и Мајкл Лајонс, кои успеаја да извојуваат по две победи во различни категории.
Драма во последниот завој и доминација на ветераните
Денот започна рано наутро со серијата А2, каде Марк Шо со својот Scarab F1 одржа лекција по возење, победувајќи пред Лотус-от на Смит-Хилијард. Сепак, вистинската драма се случи во серијата А1. Ричард Бредли водеше убедливо со својот Масерати 4CL, но неговиот болид застана во последниот завој од последниот круг, дозволувајќи му на Патрик Блејкни-Едвардс да ја „украде“ победата.
Легендарниот Жан Алези немаше среќа викендов. Иако неговите механичари работеа цела ноќ на неговото Ферари 312 од 1969 година, дефект непосредно пред стартот го спречи поранешниот Ф1 ас да се појави на гридот во серијата Д. Победата во оваа класа му припадна на Мајкл Лајонс (Surtees TS9).
Дождлив финиш и „двојни“ круни
Времето во Монако додаде дополнителен зачин во попладневните часови. Дождот ги изненади возачите во серијата Е, каде неколку болиди излетаа на славната кривина „Раскас“. Стјуарт Хал (McLaren M23) остана смирен и победи под жолти знамиња. Хал подоцна ја комплетираше својата двојна победа во серијата Г со болидот March 821, победувајќи го Алекс Кападија во Вилијамс.
Мајкл Лајонс исто така се запиша како двоен победник, откако по триумфот во серијата Д, славеше и во серијата Ф со прекрасниот Hesketh 308E (бр. 24), болидот кој некогаш го возеше неговата мајка Џуди.
Рекордна посетеност и најава за 2028 година
Организаторите од Автомобилскиот клуб на Монако (ACM) потврдија дека ова издание соборило рекорди во посетеност. Комбинацијата на звукот на класичните мотори, мирисот на рицинусово масло и ретките болиди како Бугати Тип 35 и Тирел P34 со шест тркала, привлече илјадници фанови од целиот свет.
Следниот состанок со историјата е закажан за 2028 година (од 5 до 7 мај), но возбудата во Монако не застанува тука – веќе во мај следува Е-При, а во јуни и големата трка за Гранд При на Монако во Ф1.
Погледнете ги најинтересните моменти од историските трки во видеото подолу:
