Македонскиот фудбалски стратег, човекот кој ја испиша најубавата страница во нашата репрезентативна историја со првиот настап на Европското првенство, има нов професионален предизвик. Игор Ангеловски – Мрме официјално е промовиран во нов селектор на репрезентацијата на Таџикистан.
Мрме ќе го води Таџикистан кон Азискиот куп
Фудбалската федерација на Таџикистан потврди дека 49-годишниот македонски стручњак потпиша договор со кој ќе ја предводи нивната национална селекција. Главната мисија на Ангеловски ќе биде подготовка на тимот за финалниот турнир на Азискиот куп во 2027 година, кој ќе се одржи во Саудиска Арабија.
Таџикистанските медиуми го претставуваат Мрме како врвен професионалец, потсетувајќи на неговиот историски успех со Македонија кога во 2020 година за првпат ја однесе нашата земја на Европско првенство.
Богата кариера со трофеи и меѓународно искуство
Игор Ангеловски во својата биографија ги има и најуспешните години на Работнички во последната деценија. Со „романтичарите“ тој стана шампион на Македонија во сезоната 2013/14 и освои два Купа на земјата (2013/14 и 2014/15).
По заминувањето од селекторската функција во Македонија, Ангеловски работеше и во неколку меѓународни клубови, стекнувајќи искуство во Горица (Хрватска), Каспиј (Казахстан) и Етникос Ахна (Кипар). Сега, пред него е нов селекторски предизвик каде ќе се обиде да го повтори „македонското сценарио“ и на азискиот континент.
