Ландо Норис и Мекларен приредија изненадување на почетокот на викендот во Мајами, освојувајќи ја првата пол-позиција за спринт трката во 2026 година. По четири последователни пол-позиции за Мерцедес од почетокот на сезоната, актуелниот светски шампион покажа дека тимот од Вокинг максимално ја искористи паузата за надградба на својот болид.
Мекларен со одличен ритам, Мерцедес го губи приматот
Британецот беше доминантен во текот на целата квалификациска сесија, поставувајќи најбрзо време од 1m 27.869s во решавачкиот дел. Норис истакна дека подобрувањата на болидот веднаш се почувствувале преку подобар „грип“ на патеката, што му овозможило да биде за две десетинки побрз од најблискиот конкурент.
„Убаво е да се награди тимот на овој начин. Знаевме дека надградбите ќе бидат чекор напред и навистина се чувствувам удобно во болидот уште од првиот круг денес“, изјави Норис по освојувањето на пол-позицијата.
Кими Антонели во Мерцедес успеа да го освои второто место, заостанувајќи 0.222 секунди зад Норис. Иако Мерцедес влезе во викендот без големи подобрувања на болидот, младиот Антонели уште еднаш покажа подобра форма од својот тимски колега Џорџ Расел, кој ќе стартува како шестти.
Разочарување за Ферари и Ред Бул
Вториот ред го делат Оскар Пијастри (Мекларен) и Шарл Леклер (Ферари), кои беа многу блиску до Антонели, но не успеаја да го загрозат времето на Норис. Леклер, кој беше најбрз во претходните делови од сесијата, направи грешка во својот последен летечки круг, што го чинеше подобра стартна позиција. Неговиот тимски колега во Ферари, Луис Хамилтон, пријави проблеми со менувачот и ќе стартува како седми.
Макс Верстапен во Ред Бул заврши на петтото место. Иако тимот донесе нова верзија на задното крило за овој викенд, Верстапен заостануваше речиси шест десетинки зад Норис, признавајќи дека тимот сè уште бара вистински баланс на патеката во Мајами.
Неуспех за Астон Мартин и Кадилак
Најголемото разочарување во првиот дел од квалификациите (SQ1) беа возачите на Астон Мартин. Фернандо Алонсо и Ленс Строл беа елиминирани веднаш, при што Строл не постави ниту едно време поради технички дефект по наглото кочење на патеката. Домашните тимови на Хас и Кадилак исто така не ги остварија посакуваните резултати пред својата публика, губејќи ги своите возачи во првите две фази од квалификациите.
Првите 10 за спринт трката во Мајами:
- Ландо Норис (Мекларен)
- Кими Антонели (Мерцедес)
- Оскар Пијастри (Мекларен)
- Шарл Леклер (Ферари)
- Макс Верстапен (Ред Бул)
- Џорџ Расел (Мерцедес)
- Луис Хамилтон (Ферари)
- Франко Колапинто (Алпин)
- Исак Хаџар (Ред Бул)
- Пјер Гасли (Алпин)
