Ракометарите на ГРК Охрид изборија пласман во финалето на ЕХФ Европскиот Куп, откако во драматичен реванш натпревар по изведување на пенали го елиминираа словенечкиот состав Целје Пивоварна Лашко. Овој успех значи дека македонскиот клупски ракомет втора година по ред ќе има претставник во финалето на ова натпреварување, откако минатата сезона трофејот го освои Алкалоид.
Херојска победа и покрај скратената ротација
Македонскиот претставник го доби натпреварот со вкупни 29-27, откако регуларниот дел заврши со 25-24 во корист на охриѓани. Најефикасен поединец беше Косуке Јасухира со девет погодоци, додека голманот Кристијан Пилиповиќ забележа 12 исклучително важни интервенции.
Тренерот Борис Ројевиќ по натпреварот истакна дека екипата го оставила срцето на теренот, особено поради проблемите со повредите кои ја скратија ротацијата на тимот.
„Одигравме 60 минути со два бека. Знаете колку е тешко два средни бека да носат тим против ваков ривал кој не запира 60 минути, со многу поширока ротација од нас. Да ги имавме повредените Петриќ и Борозан мислам дека ќе беше многу полесно. Многу е тешко, ама туркаме до крај да дадеме срце и душа за овој клуб“, изјави Ројевиќ.
Пилиповиќ: Одиме на победа во финалето
Чуварот на мрежата на Охрид, Кристијан Пилиповиќ, не го криеше задоволството од тимскиот дух кој пресуди во клучните моменти од натпреварот, најавувајќи поход кон трофејот.
„Можам само да кажам дека се носевме еден со друг. Капа до под за овие момци. Ова е огромен успех за Охрид. Што се однесува до финалето, ние одиме таму за да победиме. Мислам дека Татабања повеќе ќе ни одговара од Целје, бидејќи е поискусна екипа како нас. Мислам дека имаме свои шанси и ако даде Бог ќе го освоиме трофејот“, изјави искусниот голман.
Распоред за финалните натпревари
𝐓𝐇𝐄𝐘 𝐃𝐈𝐃 𝐈𝐓! 👏🇲🇰 GRK Ohrid snatch a tight win over @RKCPL to book their place in the #ehfec final!
— European Handball Federation (@EHF_Activities) May 2, 2026
They triumphed after the penalty shoot-out, and will now go head-to-head with MOL Tatabanya KC for the coveted trophy. 🏆#ehf #ehfec #handball #ecm pic.twitter.com/yND5UAMcmJ
Противник на Охрид во битката за пехарот ќе биде унгарскиот тим Татабања, екипа која во полуфиналето го елиминираше босански Извиѓач и во чии редови настапува македонскиот интернационалец Филип Талески.
Финалните натпревари се закажани за викендите на 23/24 мај и 30/31 мај. Домаќинот на првиот натпревар ќе биде дополнително одреден со ждрепка во седиштето на ЕХФ во Виена. Како што потенцираше тренерот Ројевиќ, унгарскиот тим располага со буџет од четири до пет милиони евра, но охриѓани се подготвени да го дадат својот максимум за нов европски трофеј во Македонија.
